Daily Newspaper

An buzawlah Messi goal chakpui hram

8

Spanish La Liga lama a sang pali chin pawh luah pha lo khawpa season bul tan fuh lo Barcelona chuan Pathianni zanah an game hnuhnung paruka vawikhat mah tlawm duh lo Levante UD an mikhual a, Nou Camp-ah an tlawm duh loh record kal tluang lai humhim an tum ngial a, Lionel Messi neitute khelmuala lut an nih miau avangin an game sarihnaah ngam loh an tawng ta nge nge a, sikhat faiin mualneitu team-in hnehna an chang a, goal awmchhun hi Barca captain thun a ni.

Game hniha khel tlem zawk chungin table-a pariatna luahtu Barcelona hian point kuain hmahruaitu Real Sociedad an pha lo mek a, an game khelh bak pahnihah hian chak ve ve se khelh inangah Sociedad nen hian point thum chauhin an inthlau tawh ang.

Barca tan tun kha league game 11 an khelh tawha an vawinga chakna chiah la niin, La Liga table-ah pen hnihin hma an sawn a, naktuk, Nilaini zan hian hmahruaitu Real Sociedad ngei mai chu an mikhual leh dawn a, tarlan tak ang hian, an khelmuala an chak leh chuan hmahruaitu team nena an inkar hi an pawthnai leh hret ang.

Pathianni zan inkhelah Levante an talbuai tlat a, home team khan second half laihawla Messi goal khat chiah lawm tur nei bawk mah se a khelh leh chance neihah an chungnung a, Martin Braithwaite, Clement Lenglet, Jordi Alba leh Antoine Griezmann-te’n goal thun theihna hun remchang nei vekin, Levante keeper khel tha zet Aitor Fernandez an paltlang zo tlat hlawm lo a ni.

Kum 29 mi Spaniard Fernandez hian minute 76-ah dan zawh loh a nei ta tlat chu chu Messi niin, Argentine hian Frenkie de Jong-a siamsak atangin mualneitu team hmahruaina goal a khung a, hun puma goal dang a luhbelh zawh loh avangin he goal khat hi Catalan team-in an chakpui.

Levante tana chance tha ber chu Jorge de Frutos-a chanpual niin, hun tawp dawnah Barca keeper Marc-Andre ter Stegen chuan substitute Son-a goal tur a dansak bawk.

Ronald Koeman-a team hi a hma chiah kar khan Cadiz mualah an tlawm ringawt a, Champions League lamah karliamta Nilaini khan an mikhual Juventus chuan sithum faiin an sawp zui leh a, chawlhkar chhe zet hmangliam hlim an nih avangin Levante laka Messi goal khan lawm a hlawh a, a team-mate rualte pawhin an lawmpui uar hle a nih kha.

Italian champion laka an tlawm avang khan Catalan team chuan nizan Champions League last 16 draw-ah unseeded ni chungin seeded team Paris St-Germain an tum a ngaih phah a, tualchhung league leh Europe lama an chetchhiat zawn lai taka Levante an hneh kha inrintawkna an neihkirlehna atan pawimawh hle tura ngaih a ni.

Messi khan tun season league-ah goal riat thun tling tawhin, tlawm pumpelh ringawt chunga chak harsat Levante erawh table-ah 18-na an ni duai tawh a, point hnih laiin a him chin an thleng pha lo.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy