An hmahruaia luahkir zo lo Barcelona!
Real Sociedad laka an point thum hlawhchhuah hmangin Real Madrid chuan Pathianni zanah Spanish La Liga table-a hmahruaitu Barcelona an lehpel a; Catalan-ho hian Thawhtanniah table-a a sang ber luahkir turin hun tha nei zui leh nghal bawk mah se rin loh lutukin team talbuai zinga mi Girona mualah 2-1-in an tlawm a, league game an khelh leh hma chu Spanish giants hnuaiah awmin Barca-in pahnihna an luah zui rih phawt dawn!
Real hian khelh 24-a point 60 hum chungin hma an hruai a, an hnuai chiaha chhuk thla ta Nou Camp club hian heti zat game-ah point 58 bak pel zo ta rih loin, La Liga table-a a sang pahnih hi point hnihin an inthlau mek.
Estadi Municipal de Montilivi chhunga inkhel entu mipui 14,043 lek chhuak khawm khan an mikhual palian kha an au zam a ni mai thei a; Lionel Messi kalbo hnua an innghahna lian ni chho mek Lamine Yamal meuh pawhin penalty a thelh!
Thawhtanni zan inkhel kha Catalan derby a ni ve miau a, a boruak a sang ve lo thei lo a, Hansi Flick-a naute’n Montilivi stadium atangin point an hawn zo lo!
He inkhelah hian first half chhungin goal thun zo lo mah se rin kai zawk leh inkhel thunun zawktu Barcelona tan centre-back Pau Cubarsi chuan second half tir lam minute 59-ah a defender pui Jules Kounde ball vawrh atangin mikhual hmahruaina goal a thun zui ta tho a, Barcelona colours inbel chunga a league goal hmasaber a ni zui ta nghe nghe.
Mikhual team kha nuamsaa chak zui mai tura ngaih an nih laiin thil niawma lang hi a lo ni mai thin lo a, Catalan hoin an hmahruai na goal an tihluh atanga tuibur hmuam da pawh tling loah Girona midfielder Thomas Lemar thawhrah atangin Vladyslav Vanat chuan home team siphurh a sut!
Hun pangngai tawp hma minute li chiah awm tawhah Girona bawkin goal khat dang an tilut zui leh ta mai a; he goal hi Joel Roca siamsak atanga Fran Beltran thun a ni a; mualneitu team chakna goal luh dawn intintuah vel lai hian mikhual lam chuan an right-back Kounde lakah Girona player a foul niin an puh a, mahse, video assistant referee (VAR)-in reilote a check hnuah foul a hmu lo a, goal-a puan hlen a ni.
Hun pekbelh minute kuanaah Lamine Yamal laka hlauhawm thama a foul avangin Girona substitute Joel Roca hnawhchhuah ni mah se tun season league-a vawi li tlawm tling ta Barcelona lam hian a tam zawk an nihna an hlawkpui hman ta bik lo a, season kal laia a vawi thumna atan Catalan biala inkulh ve bawk club bik lakah Nou Camp team an tlawm tling ta!
He result hma chiah karleh Ningani mai khan Copa del Rey semi-final first leg match-ah 4-0 ngawta Atletico Madrid ngam loin Hansi Flick-a team hi an lo tlawm tawh a, an game hnuhnung pahnihah an chak lo zawn ta tlat a, ngaihtuahna thar an hman ngei chu a ngaih hmel!
Girona tan erawh game thum an tlawm zawnna atangin hnehna boruak an tem leh tanna chiah a ni thung a; table-ah 12-na luah chho dawrhin, point nga zetin relegation zone an hlat ta!
An hmahruaia luahkir zo lo Barcelona!
