An inbiak hnuah Ukraine leh Russia-in mi tang inthleng
Ukraine leh Russia chu US remruatna anga Abu Dhabi-a an inbiak hnu ni hnihah an tih ngai loh tak tiin indonaa an mi an inmansak leh civil mite an inthleng tawn.
Thla li chhung mi tang an inthleng lehna hmasa berah hian civil mi pasarih telin Ukrainian 157 leh Russian sipai 157 an inthleng a ni.
Russian, Ukrainian leh US team chu United Arab Emirates khawpuiah hian an inbia a, kum li dawn indona titawp tura an mutan ber chu Ukraine-in an ram an pek then phal loh sawi fel leh Russian-ten nakin zela an beih tawh lohna tura an tana himna tha tawk an phutna thil a ni.
Eng thil tha tak mah sawi chhuah an nei lo nia sawi a ni a. Ukrainian President Volodymyr Zelensky-a chuan inbiak chu a khirh a, ‘rang taka rah tha chhuah a duh’ tih a sawi.
Russia hian Ukraine hi February, 2022 atang khan thapuiin a rûn tan a ni.
Social media-ah Zelensky-a chuan Ningani khan ‘rei tak an chawlhsan hnuah’ mi tang an inthleng tih a sawi a, an inthleng hnuhnung ber chu October kha a ni.
“Kan mite an lo haw a, Ukrainian 157. Armed Forces, National Guard, State Border Service an ni a. Civil mite pawh an lo haw a, an tam zawk hi kum 2012 hnua man an ni,” a ti a. President hian Russian-te manna hnuaia awmte chu lak kir vek a tiam bawk.
Ukrainian thuneitute chuan chhuah zinga 139 hi kum 2022 hnua Russian kuta tang niin an sawi.
Russian defence ministry pawhin Kyiv-in an mi 157 an chhuah tih a puang bawk.
Ministry chuan Russian civil mi ‘dan lova man’ pathum an kir bawk tih a sawi a. Khawthlang lama Kursk region-a chengte niin heng lai hmun thenkhat hi kum 2024-25-a Ukraine er letin an lak zingah a tel.
Abu Dhabi-a inbiakna kalpui hi tun hnaia a vawi hnihna niin US President Donald Trump-a’n indo titawp tura hma a lakna pakhat a ni.
Special envoy Steve Witkoff-a leh Trump-a makpa, Jared Kushner chu a huaihawttu ber an ni a. ‘Kumchang leh hlawk takin’ an inbia niin Witkoff-a chuan a tar lang a, ‘tih hmabak erawh a la awm’ niin a sawi.
An mutan ber chu Russia-in Ukraine khawchhak lama industry tamna, Moscow thuhnuaia la awm fel lo, Donbas region neih tel an duhna chu a ni.
A dang lehah chuan Kyiv-in nakin zela an him nana European an thawhpui leh US atanga himna tha tawk intiamna hmuh a ni.
Ram pathum an inbiak lai hian Trump-a leh Russian President Vladimir Putin-a ten Ukraine khaw vawh zual laia chawlhkar khat inbeih chawlh an remtih a tawp avangin Russia hian Ukraine hi a bei na thar leh zual bawk.
Moscow hian energy hmunpuite bitumin mi sang telin thlasik khaw vawt tak hnuaiah electricity, intihlumna leh tui an neih loh phah.
An inbiak hnuah Ukraine leh Russia-in mi tang inthleng
