Ni tam vak lo liam taa an inkah tawn leh hnuah US leh Iran chuan ‘inbengdaih’ an remti niin US thuneitu sangin a sawi tih chanchinbuten an tar lang.
Strait of Hormuz leh a chhehvela inbeihna vawi eng emaw zat a awm hnuah hei hi sawi chhuah a ni a, ram hnihte hi inkahhai bawhchhiaah an inpuh tawn.
US thuneitu sang chuan Pathianni khan CBS News hnenah lawngte chu Gulf waterway kaltlangin ‘zalen takin’ an kal thei dawn tih a hrilh a, indona hi nghet taka tihtawp theihna tura inremna siam tura inbiakna neih chhunzawm zel a nih tur thu a sawi bawk.
Thawhtanni khan Deputy Iran Foreign Minister Kazem Gharibabadi-a chuan tun kar chhung hian ‘technical talk’ neih tumna a awm tih sawi chu a hnial a; mahse, US President Donald Trump-a chuan Iran ngenna angin Qatar khawpuiah inbiak a nih tur thu a sawi thung.
“IRAN-IN INBIAK A DIL A. NAKTUK HIAN DOHA-ah INBIAK A NI ANG!” tiin Truth Social-ah a tar lang a, chipchiar a sawi lo thung.
A hnuah White House Press Secretary Karoline Leavitt-i chuan Fox News hnenah US special envoy Steve Witkoff-a leh Trump-a makpa, Jared Kushner te chu ‘tun kar chhung hian Doha-ah high-level meeting nei turin an thlawk dawn a, memorandum of understanding chungchang kan sawi chhunzawm zel dawn’ tih a sawi ve bawk.
June 17 khan US leh Iran hian point 14 awmna Memorandum of Understanding (MoU) an ziak a, hei hian ‘kil hrang hranga sipai chetna tihtawp nghal’ a keng tel.
MoU-ah hian Iran-in ‘ni 60 chhung atan sumdawn lawngte him taka an kal theihna tura theihtawp chhuah’ a remti tel bawk.
Hetih lai hian chawlhkar hnih pawh tling lo kaltaa inkahhai an rem tih chu tun hnaiah ram pahnihte an inbeih tawn leh avangin dinhmun derthawng takah a awm leh.
Ningani khan Iran-in a kah chhuah thil (projectile)-in Strait of Hormuz-a bungraw phur lawng a fuh a, inbeihna a kal chhunzawm leh nghal.
Kartawp khan US chuan a chhan let nan Iran hi a bei a, US Central Command (Centcom) chuan sumdawng lawng ‘beih chhunzawm zel’ a nih chhanna atana hmun tam tak kah a ni tih a puang.
Inrinni khan Iran chuan Kuwait leh Bahrain-a US base-te kapin a chhang let veleh a. US chuan heng kahna hian an tum an thleng lo vek tih sawiin thi leh hliam pawh an awm lo tih a sawi.
Strait of Hormuz hi tuialhthei leh boruakalhthei phurhna tui kawng pawimawh a ni a, February thla tawpa US leh Israel tang dunin Iran an beih hnuah Tehran chuan a khar a ni.
Zirtawpni khan US chuan Israel leh Lebanon inkara inremna tluantlinng a awm theihna tura thil kalpui dan tur ruahman pawm a nih theihna turin palai hna a thawk bawk.
Lebanon chhim lama Israeli sipaite leh Iranian thlawp ralthuam keng pawl, Hezbollah inkara indona a awm zel avangin chu inkahhai pawh a derthawng hle bawk.
Hezbollah hruaitu chuan inremna chu hnawlin Lebanese sorkar chu Lebanon thuneihna tichhetuah a puh.
Inremna siam a nih atanga ni hnih, Pathianni khan Israeli sipaite chuan Lebanon chhim lama Hezbollah-in a hman thin leiverh metre 200-a thui, ralthuam tam tak awm nia an sawi chu an kap niin an sawi.
Israeli Prime Minister Benjamin Netanyahu-a leh Defence Minister Israel Katz-a thuchhuah chuan an beih hmain US an hriattir tih an tar lang.
Tehran chuan US nena inkahhai an kalpui mek a ngheh zawk theih nan Lebanon-a indona chu a tawp a ngai tih a sawi.
An inkah tawn leh hnuah US leh Iran ten inbengdaih remti
