An kah hnu thla hnihah Colombia president nih beiseiawm thi

An kah hnu thla hnihah Colombia president nih beiseiawm thi
Colombian senator, president a nih mai pawh beiseiawm tak, Miguel Uribe-a chu thla hnih liam taa an ram pum nghawng khawpa a lua kah a nih hnuah a thi.
Kum 39 mi hi an khawpui, Bogotá-ah June 7 khan silaimu pathuma kah fuh niin pahnihin a lu-ah a fuh a, pakhatin a ke a fuh.
A nupuiin a thih thu hi social media-ah a tar lang a ni.
A kaptu nia hriat rawlthar man nghal a ni a, tun thlengin a kah chhan erawh hriat a la ni lo.
Uribe-a nupui, María Claudia Tarazona chuan a pasal chu ‘a nun pum hmangaitu’ a nih avanga lawm thu sawiin an fate tan ‘pa tha ber’ a nih thu a sawi bawk.
Inrinnia a awmna damdawi inin thu an chhuahah senator hi a central nervous system-ah thu putin zai ngai a ni tih an tar lang.
June thlaa Santa Fe damdawi ina dah luh a nih hnuah vawi eng emaw zat zai a ni tawh.
A nupui hian tawngtaisak tura ngenin mi tam takin an thlawpzia lantir nen punkhawm pawh an huaihawt.
Kum 2022 atanga senator ni tan, Uribe-a hi an party chuan kum 2026 president inthlan lo awm tura an candidate atan an puang tawh.
Ngaihdan lakah pawh a dinhmun hi a tha a, right-wing Democratic Centre party tana thawhhlawk tak niin left-wing president, Gustavo Petro-a sawisel nasa tak a ni.
President Petro-a pisa pawhin an ui thu an chhuah.
Uribe-a hi kah a nih tum hian veng pakhata politics thila hun a hman lai a ni a. A kaptu nia hriat rawlthar kum 15 mi hi tlanchhe mah se man a ni a. Amah puitu nia hriat mi dang pawh man nual an ni.
Senator kah a ni hi kum 1980 leh 90 chhova Colombia buai vang lai, president atana in-candidate leh Colombian mi langsar tak tak thah hun lai ang maia ngaihna a awm phah.
Uribe-a nu, chanchinbumi, Diana Turbay pawh hi drug lord rual tangrual, Los Extraditables-in kum 1990 khan an ru bo va, thla nga kawlin chhanchhuah tuma beihnaah kah hlum a ni.
Tun hnaiah Colombia hi himna kawngah hma an sawn hle a, kum 2016 khan sorkar leh hel pawl, Farc ten inremna an siam ta bawk.
Kum 2024 khan Colombia-ah hian mi 1,00,000-ah mi 25.4 thah ang zel niin kum li chhunga a hniam lai ber a ni tih security research group Insight Crime chuan a sawi a. Kum 1990-ah kha chuan mi 1,00,000-ah 70 a kai a ni.
Hmasawn hle mah se heng lai bawr ram zingah chuan Ecuador, Brazil leh Honduras te nen mi thah tamna ram an la ni tho.