Ligue 1 table-a anmahni hnaihbertu Brest nena an inthlauhna tichhah zual turin hun remchang nei mah se Paris St-Germain chuan Pathianni zana an mikhual Reims lakah point hnih hloh thenin Parc des Princes-ah 2-2 draw an hlawhchhuak a, point 10 chiahin French top flight-a a sang pahnih hi an inthlau ta.
Kylian Mbappe luh hmasak chan loh zan hian mikhual team chefuh hmasa zawkah tangin, tan atanga minute rukna lekah Marshall Munetsi chuan Achraf Hakimi tihsual hlawkpuiin goal hmahruai a khung a, mahse, mualneitu te-am hian Yunis Abdelhamid ‘own goal’ hmangin minute 11 a liam leh hnuah an siphurh an sut.
1-1 a nih hnu lawk minute 19 an khelh tlin rualin striker Goncalo Ramos chuan PSG tan khung chhunzawmin, half time-ah Paris hian 2-1-in hma an hruai thei dawn niin a lang hman a, mahse, minute 45-na a kal mek laiin Munetsi goal hmahruai siamsaktu Oumar Diakite chuan mikhual siphurh a sut ve leh a; second half-ah goal dang luhbelh loin team pahnih hi an inhnehtawk ta a ni.
PSG-a a contract neih lai zawh hun kumin nipui thawt ruala Real Madrid zawm tur Mbappe chu minute 73-ah boss Luis Enrique chuan luhtir mah se Reims lamin goal dang an chhuah belh duh ta chuang lo a, tlarhnung venhim lama an insehruh tlat tawh avangin France captain pawh ‘chance’ an siamsak tha duh lo!
A hmachiah chawlhkar tawp Zirtawpnia Monaco nen goal awm loa an inhnehtawk tum pawh khan Mbappe hi half-time laiin lakchhuah a lo ni tawh a; title race-ah an dinhmun a tha leh tawh tho bawk nen Enrique chuan star striker tel loa khelh dan lo zir lawk hi a kalpui chhunzawm zel a ni.
Ligue 1 season kal laia vawikhat chiah la tlawm PSG hian point 10-in hma an hruai fal ta a, Reims pawh chesawn loin pakuanaah an ding chhunzawm ve bawk.
An kawt kaiah PSG an chak zo lo
