Ningani zan Uefa Europa League semi-final first leg match-ah Allianz Stadium luahtu Juventus an tlawm teuh hle a, hun pekbelh mi-nute sarihna a kal mek laia Federico Gatti goal khat tihluh hmangin an mikhual inthlahrung lo Sevilla an inhnehtawk-pui hram a, Spain lei-lungah hmabak hautak an hmachhawn a ngai.
Gatti hian Paul Pog-ba siamsak atangin mualneitu team tlawm tur chhanna goal a thun a, Danilo chuan teuh takin goal ban hrulah a tauhchhuak ve bawk.
He inkhela Sevilla hmahruaina goal hi first half minute 26-a Lucas Ocampos cross atanga Youssef En-Nesyri thun niin, La Liga team hian hun tam zawk inkhel an thunun a, hma-hruaina goal thawhtu En-Nesyri leh a siam-chhuaktu Ocampos-te hian an hun tha neih bawhpelh lo phei se la Turin club kha an kawt-kaia mualpho thei an ni!
Juventus-in Gatti tauhluh bak Ningani inkhelah khan hun pumin goal zawna goal thawn-luh dang vawikhat chiah an nei!
Quarter-final lama Manchester United petchhuaktu Sevilla hian record siamin Europa League trophy vawiruk an hawn tling tawh a, an champion hnuhnunber chu kum 2020 kha a ni a, kumin hian final lut tura dinhmun tha zawk-ah an ding a, champion ngun ber record belh-chhah thei dinhmunah an ding leh mek.
Allianz Stadium in-khelah khan Juve goal lam hawia shot tum 13 an neih zinga vawinga chu goal zawnah a kal a, Turin khawpuia an result nen an ke lehlama final rap tawh tluk an ni!
An kawtkaia chak zo lo Juve
