Barcelona khelmuala 4-2 hnehna changin Girona chuan season kal lai league-a an chetthat an chhunzawm a, La Liga table-ah Real Madrid pawtthlain an hmahruaina an neikir leh.
Artem Dovbyk, Miguel Gutierrez, Valery Fernandez leh Cristhian Stuani-te goal thun hmangin mikhual team khan an Catalan thenawm team lakah a vawikhatna atan league hnehna an chang ve ta nge nge a, tun season zet chu Girona tan La Liga title rim a nam tlat!
Barca lam hian Robert Lewandowski tauhluh leh hun tawp dawna Ilkay Gundogan goal khat thun hmangin an mikhualte hi an chhanglte zo ve tawk a; an kawtkaia point thum fai thah an hloh tak rikngawt avangin khelh 16-ah point 34 hmuin table-a pathumna an luah mek pawh an luah chhunzawm zo ta lo a, goal difference-a sang zawk Atletico Madrid chuan an hmakhalh.
Michel-a team Girona leh an pawhthlak tak Real Madrid inthlauhna chu point hnih a ni ve thung a; table-a pathumna luah chho ve chiah Atletico Madrid leh an nekchhuak tak Barca lakah hmahruaitu team hi point sarihin an sang ve thung.
Pathianni Barcelona khaw inkhelah Ukraine forward Dovbyk chuan minute 12-na lekah a international team-mate Viktor Tsyhankov siamsak atangin mikhual Girona hmahruaina goal khungin, league season kal laia a goal riatna a ni tawh.
Minute 20 khelh tlin dawnah Lewandowski chuan Raphinha corner chhuih atangin Xavi team siphurh a sut ve leh a; 1-1 hian an chawllawk thei mai dawna a lan hnu first half tawp hnaih lamah Spain Under-21 left-back Gutierrez chuan mikhual hmahruai nawnna goal khungin, second half-ah erawh goal lut a fan ta raih a ni.
Minute 10 chauh awm tawhah Fernandez chuan Stuani chhawpsak atangin Girona goal thumna a khung a; hun pekbelh minute hnihnaah German midfielder Gundogan chuan home fightback beiseina tinungin an siphurh pakhat han sut then ve leh bawk mah se minute thum hnuah Uruguay forward Stuani chuan chiang zawka away team chakna goal a thawh ve leh a; Spanish top flight-a season li bak la khawsa lo leh table-a 10-na aia sanga La Liga season la khar ngai lo Girona-in Real Madrid lhepelin hma an hruai zui leh ta a ni!
Beisei loh taka rawn tha chho em em Girona hi tun season La Liga home match-ah an la tlawm lo a, Barcelona khelmuala an chak leh nen league game 16-ah point 41 humin, Inrinnia Real Betis nena sikhat ve ve thuna inhnehtawk ringawt Carlo Ancelotti team lakah point khatin an sang.
Nou Camp club pawh kha tun season-a an tlawm awmchhun chu kumin October thla nawi lama Real Madrid an hneh loh chiah kha a ni reng a, Pathianni zanah an mikhual lehnghal ngam loin an kawtkaiah point khat pawh an thawkchhuak zo lo a, game khata la khel tlem zawk lehnghal Atletico Madrid-in top three atangin an nekchhuak lawng lawng!
Inkhelh banah Barca boss Xavi chuan an ngam loh team fakin, an hmahruaina a nghet sauh a, anni nena an point inthlauhna phei chu point sarih lai a nih tawh thu leh Pathianni game-a chak zawk nih kha an phu hliah hliah thu a sawi.
Anni lam kha lo chak ta zawk pawh ni se result fair tak a nih ve tho tur thu tarlang telin, Girona lakah khan shot tum 31 zet an neih thu leh an tlarhnung buai leh thin mikhual team lamin an hlawkpui ta mai nia a ngaih thu a sawi.
Tarlan tak angin, Barcelona lamin goal attempt tum 31 an neihah tum 11-in target a fuh a, mahse, Girona keeper Paulo Gazzaniga a chesual zen zen duh lo a, vawi duai lo save pui tak tak nei chho ulh ulhin, mikhual team lamin goal zawna vawi sarih ball an thawnluha goal li an hlawhchhuak thei ta bik kha team pahnih danglamna a ni.
Inkhelh banah Girona boss Michel chuan an tumpuite hliam thei turin inrintawkna leh tumruhna, duhna leh tumna tak tak a naute’n an nei tih sawiin, Barca lam khan an nawr vak dawn tih hre sa chunga khel an nih thu leh chutih kara goal thun theihna kawng zawn tumsa ve reng an nih thu a tarlang tel.
Barcelona hian naktuk zan Champions League group stage match pakhatah Royal Antwerp an luhkhung zui leh dawn a; kartawp Inrinni khian league lamah table laihawl luahtu Valencia khelmual an lut zui leh ang.
Girona thung hian December ni 18-ah table-a 12-na luahtu Alaves an mikhual dawn a ni.
Atletico Madrid 2-1 Almeria
Pathianni La Liga inkhel dangah first half chhunga Alvaro Morata leh Angel Correa-te goal khat ve ve tihluh hmangin an kawtkaiah point thum an thawkchhuak a; table mawngphah luahtu nghet tak ni chho zel Almeria thung kha La Liga bikah a zawna match 16 chhung an chak zawh lohna a ni ta!
An khelmuala an point thum ruh hmangin Diego Simeone-a team hian Barcelona lehpelin table-ah pathumna an luah chho.
Kha game-ah khan Antoine Griezmann-a goal tur chu VAR endik hnuah offside tia hnawlsak niin, minute 17-naah Morata goal tur a chhawpsak ta tho.
Minute nga a liam leh tihah Argentine forward Correa chuan Marcos Llorente ball siamsak atangin sihnih faia mualneitu team chakna goal a thawh.
An kawtkaiah Barca an tlawm!
