An kawtkaiah Barcelona chak nuamsa

An kawtkaiah Barcelona chak nuamsa
Pathianni zan Spanish La Liga inkhel pakhatah Ferran Torres-a firsty half goal hnih leh second half-a Dani Olmo goal khat tihluh hmangin Catalan team-in an mikhual Getafe lakah 3-0 hnehna an sualchhuak a, table-ah pahnihna luah chhunzawmin, hmahruaitu Real Madrid nena an inkar chu point hnih bawkah an dahkir leh.
Nou Camp an thuamthat chhunga an home match khelhna ni mek Johan Cruyff Stadium-a mualneitu team goal hmahruai kha minute 15-na leka Torres-a khung niin, Olmo siamsak a ni.
Darkar chanve khelh pelh hlekah Spanish forward Torres bawk hian a goal hnihna thun lehin, hei chu Raphinha chhawpsak a ni thung a; ti hian, season kal laiah league goal li a khawl tling ta a ni.
Second half tira Raphinha thlaktu Marcus Rashford chuan minute 62-a Spanish attacking midfielder Dani Olmo goal tur siamsak ve lehin, Catalan giants hian La Liga season kal laia match nga an khelh tawhah tum li hnehna changin, draw vawi khat an nei tawh.
England forward Rashford hian karliamta Ningani Champions League match-a 2-1-a mualneitu Newcastle United an hnehna goal hnih kha St James’ Park-ah a thun a; Pathianni zan tualchhung league lamah erawh boss Hansi Flick chuan luhhmasaktir loin bench-ah a dah zet a, second half tirah a lut ve ta chauh a ni.
Spanish media-te tarlan danin Rashford-a bench luah chhan hi Barcelona zingkar inhmuhkhawm tuma a tlai vang a ni!
Rashford hian first half tawp dawn inbakkaih deuh avanga yellow card hmanga thunun tawk tawh Leeds player hlui Raphinha thlakin second half-ah khelmual a lut ta tho a ni.
Spanish media-te report chungchanga zawhna chhangin Flick chuan, “Ni thum ni lo dana match khel zel ang kan nih avangin rotation kalpui hi chu tihdan pangngai ve reng a ni alawm, khelmual chhungah ke thar zel kan mamawh miau a.
“Match khelh tur hi kan ngah em avangin player zawng zawngin tun anga khelh that mar tlat hi an mamawh a ni,” tiin zing training tlai lam a sawi ri lo!
Manchester United loanee Rashford hi tunhma pawhin Manchester United inkaihhruaina dan bawhchhiat vanga hrem a lo ni tawh a; January 2024 khan United-in FA Cup lama Newport an hmachhawn tur inbuatsaihna kalpui laiin Belfast khawpuiah zan hun a hmang lai hmuh a ni a, game a khelh loh phah tawh bawk.
Hei mai hi a la ni lo cheu a; kum 2022 pawh khan a mut rei avanga team meeting a nan hman loh avangin Wolves muala Red Devils chakna inkhelah luhtir a lo ni lo tawh bawk a; tuntuma bench a luah chhan Spanish media-te report pawh hi awihsak loh ngawt chi a ni lo ang!
Bench-ah han thu ren rawn mah se second half pumpui deuh thaw khelhtir a ni ta tho a; Europe-a goal hnih a thun hnuah top flight goal khung zo ta lo mah se Spain a thlen hnua a tum hnihna atan La Liga assist a siamchhuak a, chechhia a ni lo ang.
Tarlan tawh angin, defending Spanish champion hian Rayo Vallecano an draw tih loh kha chu tun season league-ah point hloh then an la nei lo a, game nge khelha la chak kim vek chunga hmahruaitu Real Madrid mawngphe an la hmu pha ve zel.
Mipui 6,000 lek lenna Johan Cruyff Stadium kha Barca B team inkhelhna thin niin, Nou Camp siamthat hna an zawh hma chu tah khan senior team-in home match an la khel rih dawn niin a lang.