Champions League round of 16 first leg inkhel pakhat zawkah Nilaini zan khan Portuguese club Benfica chuan sihnih faiin an Belgian mikhual Club Bruges an hneh a, English coach Scott Parker-a hnuaiah Bruges an talbuai rei ta hle.
Kumin kum thar hma ni chiah khan Parker hian Carl Hoefkens thlakin Club Bruges manager hna a thawk tan a, December thlaa a hna thar a chelh hnuah a hoin Bengian champion an chefuh hlei thei lo a, Europe-a an tlawm leh hnu hian Parker-a hnuaia game riat an khelh tawhah vawikhat chiah an la chak!
Chu chu an hun tawn mek ni mah se Bruges hian an club chanchina a vawikhatna atan Champions League knockout stage an lut a; he hmun thleng tur hian Paris St-Germain leh Juventus hmakhalhin Group H hma an hruai thei a, mahse, last 16 first leg-ah chuan an Portuguese mikhual lakah an tlawm a, March ni 7-a second leg an khelhna tur hi Lisbon khua a nih bawk avangin Scott Parker-a team tan quarter-final luh beiseina a chau khawp ang!
Nilaini zan inkhela Benfica chakna goal hnih kha second half ve vea lut niin, minute 51-ah Joao Mario chuan penalty atangin mikhual hmahruaina goal a chhuihlut zet a; hun pangngai tawp hma minute hnih chiah awm tawhah Neres Campos chuan chiang zawka Benfica chakna goal a thawh ve leh a, an kawtkaiah Belgians an tlawm.
Simon Mignolet-a dan zawh loh goal khungtu Brazilian winger Neres-a goal kha season kal laia Benfica Champions League goal 18-na chiah a ni.
An kawtkaiah Benfica chak phawt
