Daily Newspaper

An kawtkaiah PSG mualpho

6

Mikhual talbuai mek Nantes tihte mai mai lakah Pathianni zan khan 2-1-a tlawmin Paris St Germain chuan Ligue 1 table-a hmahruai theihna hun remchang an bawhpelh.

PSG hian first half-a Julian Draxler-a goal hmangin hma hruai zet mah se Nantes siphurh hi Randal Kolo Muani chuan a sut a, minute 71-ah Moses Simon chuan champion lai an hnehna goal khungin, Kylian Mbappe lansarh zawh loh zanah Paris an tlawm leh a, season kal lai league-a an vawisarih chaklohna niin, tun hi an khelmual hman thiam Parc des Princes-a an vawili chaklohna a ni tawh nghe nghe!

Khelh 29 atangin PSG hian point 60 an neih tawh hmangin pahnihna an luah a, AS Monaco khelmuala 0-0 draw bak hlawhchhuak zo bik lo hmahruaitu Lille nen point thumin an inthlau ta chiah a, Paris khaw inkhelah chak se la French champion hi hmahruai thei tur an ni.

Mauricio Pochettino team hian karliamta mai khan Champions League atangin Barcelona an petchhuak a, tualchhunga an chetfuh lohna atangin lei rem an rap ve tawh ang chu tih laiin an khelmual league-ah an tlawm leh a, tun hi kum 2012 hnu lama Parc des Princes Ligue 1 game-a vawihnih an tlawm zawn lehna chiah a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy