French football awpbet tlatin, nikum Fifa world cup-a best player Lionel Messi leh top scorer Kylian Mbappe bakah Brazilian star Neymar Jr. kawl bawk mah se an awh ber Champions League trophy hlat zawng bawkin kuminah pawh Paris St-Germain chuan ke an pen leh tlat tawh a, Thawhlehni zan UEFA Champions League round of 16 first leg match inkhel pakhat zawkah sikhat faiin an mikhual kawlhrawng Bayern Munich an hneh lo leh tawh!
Parc des Princes-a Bundesliga giants chakna goal awmchhun kha second half tir lam minute 53-a Kingsley Coman tihluh niin, he Frenchman hian 2020 Champions League final-a a chet hero ang bawk khan Paris khawpuiah pawh goal pawimawh a khung leh a, kum thum kalta pawh khan a club hlui PSG lakah hian Bayern chakna goal awmchhun tilutin a team chu Europe-a club trophy hlu ber a lo sualchhuahpui tawh bawk a nih kha.
Mualneitu team mangang hian damkawr Kylian Mbappe luhtirin, hun tawp hnaih lamah a team tlawm tur chhanna goal ni ngei tura ngaih a khung a, mahse, a goal thunna kawnga offside lo awm avangin hnawlsak a ni.
Ligue 1 champion PSG kechheh a buai chhunzawm zel a, ti khan, inelna hrang hranga an game hnuhnung pathumah an tlawm fai vek!
Bayern erawh nikum September ni 17 atang khan eng inelnaah mah tlawm an la nei lo tluang zel a; Champions League last 16 second leg hi Allianz Arena lama khelh hmabak a nih bawk avangin quarter-final lut tura rinkai zawk an ni lo thei lo.
Harsatna pakhat an neih erawh Paris inkhel tawp dawn hun pekbelha yellow card vawihnihna hmuh vanga hnawh-chhuah an right-back Benjamin Pavard an chhawr thei lo tur kha a ni ang.
Thawhlehni zan inkhel tan hmain PSG lamin lawmna tak thinlung an nei a, chu chu kaihza tha na avanga silawng Messi an chhawr leh thei tur leh luh hmasak chang thei tura a fit tih hriat kha a ni ngei ang a; damkawr dang Mbappe pawh bench lamah a thuchhuak ve leh thei tawh a, mahse, an kawtkaiah tlawm an pumpelh zo ta chuang lo!
Champions League knockout stage game-a starting line up luah thei naupang ber ni turin PSG mihang midfielder Warren Zaire-Emery chuan bul a tan bawk a; he French rawlthar hi khelmual a luh lai khan kum 16 leh ni 343 chiaha upa niin, a pian kum 2006 kha a team-mate kum 35 mi Lionel Messi kuta Champions League title hmasaber a luh kum chiah a ni nghe nghe.
Parc des Princes inkhelah khan Mbappe kha lut lo tluan tura ngaih ni mah se si an phurh hnu lawk second half tir lam minute 57-ah luhtir a ni a, an boss Christophe Galtier mangangin hnawhlut bawk mah se a khelh danah a malpui hliam a la dam chiang lo tih a hmuh theih a, pawmsak leh tak loh goal thun bawk mah se a dam chian laia a khel a pha lo.
First half chhungin PSG-in goal thun theihna hun remchang siamchhuah an harsat a; ball chang tam zawk mah se Coman-a goal a luh hma zawng kha chuan Bayern pawhin chance tha an hmu thei bik lo.
Paris khuaa piang, PSG youth team atanga ei tling tura inzirchhuak winger Coman khan veilam sir atanga Alphonso Davies cross atangin mikhual chakna goal awmchhun a khung a; he goal chhuahtu Italian keeper Gianluigi Donnarumma hian hun tawp lamah pui takin Eric-Maxim Choupo-Moting leh Pavard-te goal tur a dansak.
Malpui hliam atanga zaa zaa la fit chiang lo mah se Mbappe luh hnuah PSG an kang ngei a, Yann Sommer chuan hnai set sawt atangin Bayern keeper a tihthaih a; minute 82-ah phei chuan Mbappe hian mualneitu team siphurh sutna goal a khung ta hial a; mahse, home team goal lawm hun hi a rei ta lo a, French striker goal tur a siamsak dawn lai tak khan left-back Nuno Mendes chu chhetein a lo offside teih tih video assistant referee (VAR)-in a lo hmu khiau a, he goal hi pawm a ni lo.
Coupe de France lamah Marseille hneh loin an tlawm a, Ligue lamah Monaco an ngam lo hlimhlawt bawk a, Europe tournament pawimawhah pawh an kawtkai lehnghala an chak lo leh ta hian manager Christophe Galtier-a dinhmun pawh a tiderthawng pha dawna ngaih a ni.
Champions League trophy la hawn ve ngai lo PSG hian March ni 8 khian return leg an khel leh dawn a, chumi hmaa an ban lo a nih chuan inhamtang zui turin Germany rama duhthusam result an hlawhchhuah a tul tawh khawpin a rinawm!
Kumin bika inelna hrang hrangah belhkhawmin PSG hi vawinga ngawt an tlawm tling ta a, kum zawna Champions League last 16 pelh zawh loh chu manager ruaitute tan ngawihpui mai a har khawp tawhin a rinawm!
An kawtkaiah PSG tlawm leh phawt!
