An kawtkaiah Real chak nuamsa

An kawtkaiah Real chak nuamsa
Gonzalo Garcia Torres-a hat-trick siam hmangin Pathianni zanah Real Madrid chuan 5-1 tehrengin an mikhual Real Betis an sawp a, Spanish La Liga table-a an chung chiaha hmahruaitu Barcelona nena an inthlauhna chu point 4-ah bawk an dahkir leh.
Bernabeu stadium-a goal hmasaber hi minute 21-na leka Spanish foward kum 21 mi Garcia tihluh niin, he inkhela a goal hmahruai hi La Liga goal a khung vawi khatna a ni nghe nghe.
Inhliam Kylian Mbappe hmunruak luahtu Gonzalo Garcia goal hmahruai kha mipui 75,190 hmaa first half goal hmuh tur awmchhun niin, Brazilian Rodrygo siamsak a ni.
Second half tir lam minute 50-ah Garcia bawk hian a goal hnihna hlaplut lehin,, tuntum hi chu Federico Valverde chhawp sak a ni thung.
Minute ruk a liam leh tihah Raul Asencio chuan Rodrygo siamsak atangin si thum faia mualneitu team hmahruaina goal thawh ve lehin, minute 66-ah Betis lam hian an siphurh pakhat sut thenin, he inkhela Madrid keeper Thibaut Courtois-a dan zawh loh awmchhun goal thuntu hi Cucho Hernandez a ni.
He mi hnu hian Betis lamin an nawr chhunzawm a, goal ban han fuh lehte neiin, home team an chhaihbuai hman viau dawn a, mahse, hun pangngai tawp hma minute riat la awmah Garcia bawkin a hat-trick siamna goal a khung er leh zawk a; Madrid goal ngana chu hun pekbelh minute thumna a kal mek laia Fran Garcia thawh a ni thung.
Ti hian, table-a pahnihna luahtu Real hian Barca kal fal tur an hnaih chho leh ta a; Betis erawh paruknaah an thu chhunzawm.
Real Madrid hian January ni 8, Ningani Super Cup semi-final match lama Atletico Madrid an hmachhawn dawn avangin kartawpah La Liga match an khel lo ang.
Pathiannia hat-trick siamtu Gonzalo Garcia khan 2024-25 season mai khan an second team Real Madrid Castilla tan khelin goal 25 a thun tling a; kumina Real game hmasaberah khup hliam avangin Mbappe a iinkhel thei lo a, chu hmunruak chu luahin French striker theih loh a hlawkpui ta hle mai a, Xabi Alonso mit pawh a tlung hle tura ngaih a ni!
Gonzalo hian nikum khan Fifa Club World Cup-ah goal li thunin hming a lo chher hlak tawh bawk a, kha goal li hmang khan tournament joint top-scorer a ni nghe nghe.
Tun season inelna hrang hranga goal 29 thun tling tawh Mbappe bakah a senior dang pathum Rodrygo, Jude Bellingham leh Vinicius Junior-te a ngaihsan thu leh khawvela player tha ber ber an nih thu Garcia hian a sawichhuak a, tunah chuan he’ng Real tlahma luahtute tan el tham a tling chho dawn ta niin a lang!