Second half tir lam minute 65-a substitute Vinicius Junior-a goal khat tihluh hmangin Real Madrid chuan season thara an La Liga home match khelh hmasakberah point thum an hlawhchhuak a, khelh thumah point sarih hmuin table-ah pathumna an luah.
Nilaini zan Alfredo di Stefano stadium inkhelah Real Valladolid keeper Roberto Jimenez chuan tha takin Federico Valverde leh Luka Jovic-te goal tur dansak mah se an tlawmna goal awm-chhun Brazilian thun a dang zo lo a, hmahruaitu Getafe, pa-hnihna Valencia leh an hnuai chiaha awm Villarreal-te nen point sarih theuh an kawl.
A hma chiah game-ah pawh bench lo luah tawh Vinicius Junior chu tun season league-a home game an khelh hmasakber tum pawhin manager Zinedine Zidane chuan bench lamah bawk a thuttir leh a, mahse, Brazilian winger aia a rin zawkte paw’n goal an thun zawh loh laiin Vinicius hi West Ham keeper hlui Jimenez paltlang theitu awmchhun a ni a, season hnuhnung pahnihah goal-a a mir loh thinna kha kumin hian a kalsan dawnte pawh a ni mai thei a, engpawhnise, a chakna goal tihluh kha boss hnena thuchah puanna tha tak zawng a ni phawt ang!
Valladolid lamin La Liga champion mualah inpek mai an tum bik lo a, second half laihawlah goal khat chhuah bawk mah se a tir atanga a tawp thlengin an khawng tluan ve tlat a, point thum thawkchhuak turin Real Madrid pawh an thawhrim hle a ngai ve tho.
Zidane chuan Serbian striker Luka Jovic bawk duhsak lehin luthmasa zingah a telh leh a, mahse, goal-ah ahlawhchham leh.
Mualneitu team hian a tir lam minute 10 khelh pelh hlekah hmahruaina goal an thun teuh viau a, mahse, Valladolid keeper Roberto chuan Fede Valverde ‘shot’ a dansak hlauh.
Tun season-a a vawikhatna atana team luah Marcelo pawhin Jovic-a cross atangin hlauhawm a siamchhuak ve vuai a, a hlawhtling zo bik lem hlei lo a; Serbian forward Jovic pawhin bul tan tha dawn fu mah se a hna ber goal thun a hlawhtlinpui zo bik lo a, club an tawngfuh a nih chuan loan-a a chhuah theihna kawng an la hawng reng nia sawi a ni.
Nilaini zan inkhelah hian Luka Modric, Isco leh Karim Benzema-te pawh eng ruai an ang zo lo.
Darkar khat an khel tling tihah Zidane chuan a duhtawk ngahin Jovic, Isco leh Alvaro Odriozola-te a lachhuak thawt a, an hmunruakah Marco Asensio, Dani Carvajal leh Vinicius a luhtir a, Valladolid an hmachhawn hma lawk training laia intina leh Eden Hazard chhawr theih a la ni lo.
Nilaini La Liga inkhel dangah goal awm loin mualneitu Huesca leh Atletico Madrid an inhnehtawk a; Villarreal-in 3-1-a an mikhual Alaves sawpin, Eibar mualah sikhat faiin Elche an chak thung.
(THE AIZAWL POST – Infiamna)
Full>> ePaper Subscribe
