An lakah Trump-a thinrim mah se Russia-in US la thawhpui zel
President Donald Trump-a’n an lakah ‘a thinrim hle’ tih a sawi hnu lawkah Russia chuan US nen an ‘la thawkho zel’ tih a sawi ve thung.
Trump-a’n Russian president a sawisel hnua a vawi khat nan Kremlin chuan hruaitu pahnihte inkarah inhriat thiam lohna awm ang thei tura tihna chu a la pha rih zel.
“US nen hian kan la thawkho zel a, a hmasa berah chuan kan inkar siam that zelnaah a ni,” tiin thupuangtu, Dmitry Peskov-a chuan a sawi.
Tun karah Putin-a leh Trump-a an inbiak tur chu a sawi miah lo va; mahse, ‘a tul a nih chuan’ Putin-a chu a inhawng reng tih a sawi.
Pathianni khan Trump-a hian NBC News-in an kawmnaah Putin-a’n Ukrainian President Volodymyr Zelensky-a thawhrimna tichhiaa a bei chu a thinrim tih a sawi a, Putin-a hian inkahhai a pawm lo a nih chuan Russian tuialhthei leinaa chhiah chu 50%-a tihsanah a vau.
Trump-a thil sawi hian Russian president nena an inkar tha ang taka lang tawh chu mi thlir dan a tidanglam nghal.
US leh Russian thuneitute hi chawlhkar eng emaw zat chhung Ukraine-a indona tihtawp nan an inbe tawh a, Trump-a hian Putin-a ni lovin Zelensky-a zawk a lo sawisel thin.
Zirtawpni khan Putin-a hian Ukraine-ah hian President Zelensky-a thlak theih nan UN kaihhruaina hnuaiah sorkar lailawk din ni se tih lam hawiin thu a sawi a, hei hian Trump-a a tithinrim hle a ni.
“Hetianga thil i sawi hi ka thin a rim hle a. Putin-a hian Zelensky-a thatna hi a bei a, kawng dik lovah a kal a ni,” tiin Trump-a hian NBC News-ah a sawi a ni.
Ni tina thuthar lakhawmtute a kawmna thina Thawhtannia a kawm lehnaah Peskov-a chuan NBC-in Trump-a an kawmnaa thil sawi lan chu mi thenkhatin an sawi vung mai mai niin a sawi.
Trump-a thil sawi hi Russian chanchinbuah pawh tar lan a ni nasa a. Kremlin thlawptu Russian chanchinbu, Moskovsky Komsomolets chuan US president sawisel khât hle mah se Trump-a hian Ukraine-in Russia energy hmun a beih a titawp thei bik lo niin an tar lang.
An lakah Trump-a thinrim mah se Russia-in US la thawhpui zel
