An muala tlawm Real Madrid!
Pathianniah sihnih fai tehrengin Real Madrid-in an mikhual Celta Vigo an hneh lo a, he thu buatsaih lai thleng hian Spanish La Liga table-ah pahnihna la luah zui hram hram bawk mah se hmahruaitu Barcelona lakah point li ngawtin an hnufual tawh a; an hnuai chiaha pathumna luahtu Villarreal chuan game khata khel tlem zawk chungin Madrid mawngphe an hmu pha reng a, point khat chiahin an inthlau!
Santiago Bernabeu inkhelah first half chhungin a tu lam ve ve mahin goal an khung zo lo a; second half erawh a boruak a dang ta daih a, mualneitu team lamin red card vanga player pahnih ngawt an hloh laiin mikhual team tan Williot Swedberg chuan goal hnih a sualchhuak a; tun season-a Real 100% home league record tawp felin, an khelmual hman thiama match ruk an chak zawnna a tawp fel ta bawk!
Swedish substitute Swedberg hian second half tir lam minute 53-ah Bryan Zaragoza ball siamsak hmangin Thibaut Courtois dan zawh loh mikhual goal hmahruai thunin, hun pekbelh minute thumna a kal mek laiin a goal hnihna leh sihnih faia Celta Vigo chakna goal ni zui ta a thawh leh a, an kawtkaiah meikhupin Spanish giants an tlawm!
Si an phurh hnuah Real an talbuai a, minute 64-ah second 60 lek chhunga yellow card tum hnih a hmuh avangin an Spanish left-back Fran Garcia hnawhchhuah a ni a, Real tlarhnung a zuamawm sawt!
Hun pekbelh minute hnihna a kal mek laiin Real defender dang Alvaro Carreras pawh yellow card pahnih hmuh vang bawkin hnawhchhuah a ni zui leh a, inkhelh banah Real Madrid manager Xabi Alonso a lawm lo ngang mai!
Chanchinbumite hnenah Real midfielder hlui hian referee thutlukna siam dana a lungawiloh thu sawichhuakin, Alvaro card hmuh chhan kha inhnial theih tak a nih thu leh card sen phawrh tura referee a hmanhmawh lutuk kha tha a tih loh thu a sawi.
Alonso chuan, “Kan zavaiin kan thin a ur vek a, kha match leh kan result hmuh kha kan duhdan a ni lo. Militao inhliam khan kan na a belh chhah,” a ti.
Real team hi an league game khelh hnuhnung vawi ngaah tum khat chiah an chak zo a, zanin Champions League-a an mikhual tur Manchester City pawh hian an zuam phah deuh ngei ang le!
Europe game an hmachhawn mek thlir chungin Alonso hian a ka a ang zui nghal a, a theih anga rangin phek danga an pakai a ngaih thu leh Champions League game-a City an hmachhawn hunah hian insiamthat ngei an mamawh thu a sawichhuak.
Tun kha season kal laia Celta-in league game 15 chhung goal an chhuah lohna a ni tawh a, kum 19 chhunga Santiago Bernabeu khelmuala an chak vawi khatna hmang khan league khelh 15-a point 19 hum chungin Galician club-in table-ah 10-na an luah chho.
Celta Vigo keeper Ionut Radu chuan first-half chhungin Jude Bellingham-a tauhluh tur a dansak bakah second-half lama Kylian Mbappe free-kick chhuih pui tak a dang zui leh ngat bawk.
Inrinni khan hmahruaitu Barcelona chuan Real Betis khelmualah 5-3 hnehna an chang a, Ferran Torres chuan first-half chhungin ‘hat-trick’ a siam hman nghe nghe a nih kha.
An muala tlawm Real Madrid!
