An sipai beia puhin Israel-in Gaza a bei thar leh
Israel chuan Pathianni khan an sipaite an bei nia sawiin Gaza an bei leh tan a, US ruahman anga inkahhai kalpui mek chuan fiahna a paltlang mek.
Gaza-a cheng leh damdawi thuneitute chuan Israeli-ten thlawhna leh tank hmanga an kahnaah hmeichhe pakhat telin mi 18 vel an thi niin an sawi.
Israeli sipaite hian Hamas bik bitumin leiverh, ralthuam dahna leh an pawl mite an kap tih an sawi.
Israeli Prime Minister Benjamin Netanyahu-a chuan Hamas-in inkahhai an bawhchhiat avangin sipaite che turin thu a pe tih a sawi a. Sipaite hian Rafah chhim lama helhovin anti-tank missile leh silaiin an sipaite an kap tih an sawi a ni.
Hamas sipai pawl chuan inkahhai thuthlung an la vuan reng tih an sawi a, Rafah-a silai hmet puaktute nen chuan March atang khan an inbe tawh lo niin an insawi.
Israeli venhim hna thawktu hotu pakhat chuan Gaza-a puihna phurh luh pawh thu chhuah a awm leh hma atan an titawp tih a sawi a, Hamas hian nasa takin inkahhai thuthlung an bawhchhia tih a sawi bawk.
Inkahhai a tawp mai hlauvin Palestinian thenkhat chuan Nuseirat camp-a mite chuan mamawh an lei khawp a, thlawhnaa kah an nih hnuah chhim lama Khan Younis-a chengte chuan an in an chhuahsan leh bawk.
Israel leh Hamas-te Gaza-a an inkahhai hi October 11 atanga hman tan niin kum hnih an indo tawh a tawp a; mahse, lehlam lehlam hian bawhchhiaah an inpuh tawn reng thung.
Israeli Defense Minister Israel Katz chuan inremna anga an sipaite inhnuhkirna tur chin an siam a, hei hi pel emaw, pelh tum emaw chu an kap zel dawn tih a sawi.
Hamas pawhin Israel hian vawi tam inkahhai bawhchhe tawhin mi 46 an that leh tawh a, ni tin mamawh an luhtir lo bawk niin an sawi.
Inrinni khan Israel hian Gaza leh Egypt inkalpawhna, tun kara hawn tura beisei, Rafah border crossing chu khar rih a la ni dawn tih an puang a, Hamas-in inkahhai an zawm that leh that lohva hawn chu a innghat tih an sawi.
Israel hian Hamas-in an mi hren thi tawhte ruang an hlan muang niin an sawi bawk. Helho hian kar hmasa khan mi hren dam 20 an chhuah a, a hnuah thi tawh 28 zinga ruang 12 an hlan tawh bawk.
Hamas hian ruang kawl reng chu an tum lo va; mahse, indona avanga an hmunhma chhe tawh tak haia ruang zawnna hmanrua an mamawh tih an sawi.
Rafah hi May, 2024 atanga khar kha a ni a. Inkahhaiah hian Gaza-a puihna tam zawk luhtira August atanga tam tuarte pek tumna a tel.
Inkalpawhna dangah puihna hi luhtir a ni a; mahse, Pathianni atang khan Israel-in a titawp leh ta rih.
An sipai beia puhin Israel-in Gaza a bei thar leh
