Daily Newspaper

An zombied tawh che em?

20

Nidhi Arora, kum 31, Mumbai-a advertising executive chuan thla li nga vel kalta khan a mipa duh deuh mai a tawng a, an inzui ta a. An inngaizawng hle mai a, nuam pawh an ti. Nitin mai rei tak tak an in-text a, an in-call a, nuam an tiin an hlim dun hle. A tia lawm Nidhi chuan, “Tichuan ni khat chu, ka bialpa chuan ka message te chu tawi te te chauhin a rawn chhang ta a. Nakinah phei chuan min be ngai ta lo. A reh ta daih mai a. Na ka ti hle mai. Mahse, hmalam panin ka pen thei a,” a ti. Mahse, thla thum hnuah a bialpa chu a rawn kir leh ta, a hma ang bawkin a rawn text leh tan ta. Nidhi chuan, “Kan inkar a tawp tawh ni a ngaiin, hmalam ka lo pan san tawh a. Mahse, rin loh deuhin a text ka dawng leh ta fo mai a, a hma anga inzui leh a duh a ni,” a ti. Nidhi hian a ‘ex’ chuan a ‘zombied’ a ni tih a hrethiam lo a ni.

Hetiang hi i tawng ve tawh em? Hetiang tawng ve tawh, engtia tih nge tha ang ti a, a ngaihna hrethiam lo tam tak kan awm ngei ang. Ngaihzawng te nen kan induh em em emaw kan tih laiin, min hlat tial tial a, min reh san ta daih a, chutah inthen anga awmin nun thar kan tan leh dawn chauha, an rawn lang leh thut a, a hma anga inzui leh an rawn duh a. Chutiang chu a tuartu tan a na duh hle a ni.

Engineer pakhat Samit Gwalani pawhin hetiang hi a tawng tawh a, tihian a sawi, “Nikum December kha a ni a, party-naah hmeichhe pakhat nen kan in tawng a, kan innel ta hle a. Kan in-text a, kan in-date zui ta a. Ka tana khuanu ruat ni ngeiin ka ngai a, mahse, thla hnih vel kan inzui hnuah, ka text a chhang tlem tial tial a, a reh ta daih mai. Ka message pawh a chhang ngai ta lo. Hrehawm ka tiin na ka ti hle mai a, tichuan kan inhmuhna thin, kan kal dun thinna hmun te pawh ka hêl ta zak zak a, ani chu ka ngaihtuahna atanga paih bo ka tum a ni. Tichuan, thla ruk hnuah, min rawn text ve leh ta hlawl mai, “Hey thianpa, khawiah nge i awm?” a rawn ti a. Chutihlai chuan kei chu ram dangah hnathawkin ka lo kal hman tawh. Tuna a message ka dawng leh hi nge na zawk a, a hmaa min kalsan lai kha tih pawh ka hrethiam lo,” a ti.

Hetiang hi tawng ve ta la engtin nge i tih ang?

Relationship counsellor Natasha Mehta chuan hetiang tih ching hi an tam hle niin a sawi a, chhuanlam siamin inngaihzawn leh dan an zawng a, “‘Khatih lai khan ka rilru ka lo hrechiang lo a ni. Ka duh zia che hi ka hre thar telh telh a ni,’ te an ti a. Mahse, dawt a ni tlangpui. Inngaihzawnna chuan eng boruak nge a ken kan hre vek a, anni kan tana inpek em em laia in-pil-bo-san a, in-reh-san hmak chu thil dik lo tak a ni. Chumi hnuah i inlan leh a, i va beisei leh a nih chuan a hma anga thil a awm beisei tawh bik suh. Khami i zombied ngei kha, a natna i belhchhah leh mai mai a ni. I be pawp leh duh tak zet a nih pawhin, thupha chawina nen bul tan ang che,” a ti.

Clinical psychologist Dr Seema Hingorrany chuan, “Psychology-ah chuan hetiang hi nghet lo zia kan ti a. Hetiang mi hi chuan midangin eng angin nge an tawrh a, eng nge an chungah thleng tih an ngaihtuah pha ngai lo. Hetiang mi hi chuan an ngaihzawng thar te lakah an beisei ang hmuh loh emaw, a lawm zawh tawk loh emaw chuan, an kalsan tak, a hma a mi te kha an lo tha zawk tih an hrechhuak leh a, kir leh an duh thin. Chutiang hunah chuan mi rilru an tibuai vek thin. “Ka lo pawm leh ang em?” tih zawhna min zawttu pawh hi an thahnem ta khawp mai a, ka thurawn chu, “In be leh dawn a nih chuan muangchangin kalpui u la, in rilru zawng zawng pe tawh suh u. Engtikah emaw a kalsan leh thut lovang che tih a sawi lawk theih loh. Chutihrualin, inchhir tak tak a i hnena rawn kir leh pawh a ni ve thei tho bawk. Mahse, chu chu hunin a hril ang chu. Nghah peih philosophy hi hman tur a ni,” a ti.

Eng nge a rawn thlen dan. Tu emaw nen in inngaizawng a, mahse, ani chuan a be tha ta lo thut che a. A chhan zawh i tum a, a chhang duh si lo che. A reh ta daih a. Tichuan, nang pawhin ani chu theihnghilha nun thar neih tuma i insiam rem mek laiin, kar hnih khat emaw thla hnih khat emaw hnuah, a rawn lang leh thut a, a hma anga inngaihzawn leh a rawn duh leh si. Chu chu zombied an tih chu a ni.

Ghosting an tih hi i hre tawh ngai em? Ngaihzawng te then dana ngeiawm ber a ni a, a tuartu tan a na hle. Engmah sawi lo va inrehsan hmak hi a ni. A chhan pawh sawi lo, engmah sawi zui awm lo va in-reh-san-hmak hi. Hetiang hi a tuartu zawk tan chuan na ngaih ngaih tak a ni.

Breadcumbing an tih ve thung chu le, ngeiawm tak a ni. Tu emaw then tih dawna ni chiah si lo, a inthen lo tawk vel, a inuaibet tawk vel leka biak ve luk-lak a, thil tak tak tihpui leh duh chuang si lo boruak hi a ni.

Benching ve thung hi le. I ngaihzawng khan a be tha ta lo riau chein i hria a, a then che chu a ni si lo, mahse, midang remchan loh kara a thlaktua tang anga inngaihna i nei ru ta deuh tlat. A back-up list-ah i awm tihna a nih ber chu. Hetiang hi tunlaiin a common riau!

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy