Anaemia laka himna tur inzirtir
Serchhip district-a Women & Child Development leh Health department tangdun chuan Thawhtanni khan Anaemia Camp an buatsaih a, millet (Buhtun) ei thatna leh Anaemia venna tha a nih dan inzirtir niin, thupui atan ‘Test Treat Talk’ tih hman a ni.
Poshan Abhiyan district coordinator James Lalremliana sawi danin, Ministry of Women & Child Development ruahman angin March 20 – April 3 chhung hian hapta hnih awh Poshan Pakhwada hman a ni a. Chaw tha ei a tul zia, a bikin tleirawlten chaw tha an ei theih na’n inzirtir a ni.
Hun hmangtute sawi danin, sawrkar laipuiin hmeichhe tleirawlte a ngaipawimawh a, an veng theuha Anganwadi Centre-ah chhinchhiah vek niin, kum khat chhunga chaw tha an ei tur a thlawnin an dawng dawn a, chu chuan thisen tlakchhamna (Anaemia) a veng dawn a ni. Tleirawlte hi an hrisel chuan nakinah fa nei rual an nih hunah fa hrisel tak an hring thei anga, tun atangin an ei leh in uluk tura chah an ni. Chu’ng zingah chuan millets hi chaw tha a nih avangin ei tam inzirtir a ni.
Taksa in a mamawh tawk thisen a pai loh chuan Anemia natna kan nei tihna a ni a. He natna hi khawvel puma mi hrang hrangin harsatna an tawh langsar tak a ni. A lanchhuah dan chu, taksa a dawldang a, taksa zawi, chauh thut, ngaihtuahna hmang ding thei lo tein an awm thin. Hmeichhe tleirawlte chu taksa inthlakthleng hun laiin thisen mamawhna a sang a, thla tin hmeichhe hunbi nei hun a nih bawk avangin thisen tlakchham hi a thleng duh a. Ei leh inah fimkhur tura chah an ni.
Kamram mai mai ei loin, a hunbi a chaw pangngai ei thin tur leh, chaw ei loa school kai mai lo tur leh mahni tui tih zawng chauh nilo, taksa mamawh thlai hring ei tam tura chah an ni.
He hunah hian Anganwadi centre-a thawktute leh an centre huamchhunga tleirawl kum 14-18 inkar thlanchhuahte an kalkhawm a. Inzirtirna bakah tleirawlte hi HB test sak an ni a, a hniamte tana damdawi ei tur hi Anganwadi Centre kaltlangin pek an ni dawn a ni.
Anaemia laka himna tur inzirtir
![](https://theaizawlpost.org/wp-content/uploads/2023/03/ane-1024x683.jpg)