Andreeva laizawn unau intawn vawikhatna

Andreeva laizawn unau intawn vawikhatna
Wuhan Open khelh mekah professional huanga la intum ngai lo Russian unau a vawikhatna’n intum a, Erika Andreeva chuan a laizawn leh ranking-a a aia sang ni bawk, a nau Mirra Andreeva laka 6-3 6-1 hnehna changin third round a lut.
Russian pair hi Kentucky lama August 2020 Top Seed Open-a Serena Williams-in a u Venus a hneh hnua WTA main draw match-a laizawn unau inhmachhawn leh hmasaber an ni.
Kum 20-a pa Erika khan kum 17 mi a nau Mirra a paltlang hnuah quarter-final luh tumin Italian world number six Jasmine Paolini a hmachhawn leh ang.
16th seed Mirra leh Erika-te khan an insut hmain thu an tiam lawk a, tu zawk zawk pawh lo tlang se second round paltlang mana prize money dawn tur chu insem turin thu an thlung!
French Open semi-finalist Mirra hi karliamta mai khan kum 2006 hnu lama top 20 luah pha naupangber a ni a, Beijing khawpuia China Open quarter-final a thleng khan ranking lamah a dinhmun a chawisang a ni.
World number 70-na daih luahtu a u Erika lakah rinkai zawk ni mah se a lo sawilawk tawh ang ngeiin Mirra tan Erika hmachhawn chu mangchhia ang mai a ni ta tak tak a nih kha!
Grand Slam vawinga a hmachhawn ve tawhah Erika hian second round a la pel zo lo a, kum 2021 khan junior French Open runner-up a ni ve tawh thung.
NIngani vek khan Wuhan-ah hian US Open champion Aryna Sabalenka leh world number four Coco Gauff-te paw’n an tumpui ve ve laka straight-set hnehna changin last 16 an lut ve bawk.
He tournament-a number one seed luahtu Belarusian Sabalenka hian a Czech tumpui Katerina Siniakova lakah 6-4 6-4 hnehna changin, American kum 20 mi Gauff chuan Pathianni China Open title a lak hnua a trophy dang beisei zui lehna kawngah 6-1 6-2-in Viktoriya Tomova of Bulgaria a rapsawr ve bawk.
US Open runner-up Jessica Pegula leh Olympic gold medallist Zheng Qinwen pawh chak zingah telin, Zheng hi kum 2013-a chak hnem Li Na hnu lamah Chinese hmeichhe zinga kum khata match 40 chak tling leh thei hmasaber a ni.
Wimbledon champion Barbora Krejcikova erawh world number 102 Hailey Baptiste of the United States chuan 6-3 7-5-in a vaw tla ringawt thung!
Round one lama British number one Katie Boulter hnehtu Ukraine nula Lesia Tsurenko chu second-round match khel tluan thei loin hliamin a tibuai a, an ram thenawm Poland mi Magda Linette laka set khatnaa 2-5-a a hnufual laiin a inhnukdawk.