November 1, Pathianni zan khan English Premier League 2026-27 khelh chhunzawm a ni a, Anfield a inkhel hmuhnawm takah Arsenal an chak. Chak an harsatna hmun Anfield a chak nawlh Arsenal hian point thuma hmahruai falin table chung ber an luah. An tlawm danah Reds an lawm lova, an manager Andoni Iraola chuan a player te chu tlu der ve thin turin a hrilh hial.
Manchester City tlawm hlawkpui ngei tum Arsenal hian kum 14 zet hnehna an chan theih tawh lohna hmun Anfield an pan. An tana hmun ralti leh hmun hreawmah bul an tan tha a, goal pawh an thun har lo. Hlauhawm zawka an tan reng hnuin Declan Rice cross tha tak chu Kai Havertz chuan awlsam takin a pet goal a, minute 16-naah hmahruaina goal a thun. Havertz hian EPL-ah goal 46 a thung tling chiah a, German zingah EPL a goal thun hnem ber niin Ilkay Gündogan record a khum chiah.
Arsenal goal thun hian mualneitu Liverpool a chhaihkawlh a, na takin an khingpuite nawr zui nghalin Arsenal an bet nghal rawk rawk. An khingpuiten an nawr nat em vangin Arsenal tlarhnung an buai zauh zauh a, an inman tawk loh leh ball pek sual an neih zauh zauh vangin goal an chhuah lek lek thin. Goal thun ngei tura tan khawh Reds tan hian Florian Wirtz chuan freekick atangin goal a thun teuh hle a, goal bar a pet per. Si nghak David Raya chetthat bakah an vanneih a kaltluan vangin Arsenal hian goal an chhuah hram zel a ni ber.
An hun tha neih chhawr tangkai thei lo mah se Liverpool in goal thun ngei tumin thapui an thawh zui char char a, penalty hmu ngei turah inngai bawk mahse an hlawhtling zo lo. Reds forward Alexander Isak ball tauh tur chu Arsenal defender Jurien Timber-a’n a kawr hnungah a pawt a, Isak hian ball a tauh theih loh phah. Timber chet dan vangin Liverpool in penalty hmuh ngei beisei mahse an hlawhtling zo lo. Penalty a hmuh loh vangin an lawm lo zui hle nghe nghe. Liverpool manager Andori Iraola leh catain Virgil van Dijk ten pawhin kha tiang angah kha chuan tlu ve thin tawh turin Isak hi an hrilh zui hial nghe nghe. Mawihawih zawn lutuk vanga tluk der loh ngawt pawh a ni ber lova, point hmuh a pawimawh an ti a ni ber mai.
Chawlhlawk hmaa goal lut a awm belh theih loh hnuin chawlhlawk hnu lamah inkhel a hmuhnawm chhunzawm a, goal erawh an luh belh thei bik chuang lo. Team lian pahnihte hi goal thun ngei tumin an innawr tawn a, inkhel hmuhnawm tak an lantir. Reds hian an mikhualte nawr tawm viau mah se Arsenal tlarhnung inremphui tak an su tlang zo lo. Arsenal tan Christos Tzolos-a’n goal thun theihna hun tha tak a nei a, lei hrulah pet chhe lem lo mahse si nghak Alisson Becker chuan pui zetin a lo dang a, an team a chhamhim. Liverpool hian penalty beisei thin mahse an hlawhtling thei lo zel a, an mualah goal thun thei lo tluanin an elpui lian Arsenal lakah uiawm takin an tlawm.
Arsenal lakah an tlawm tumin Liverpool hian goal zawna pet (Shot on target) vawi khat lek pawh an nei thei lo. Premier League chanchinah Liverpool in Anfield-ah ngei shot on target an neih miah loh vawi khatna a ni hial nghe nghe. Reds hian EPL season kal meka Anfield-a an khelhah goal li chiah an thun a, Anfield-ah khelh goal an thun tlem tum 1913-14 leh 2012-13 an nih rual der tawh.
Liverpool in Anfield-a bul an tan chhiat laiin Arsenal erawh chuan hun rei tak hnuah Anfield a hnehna an sual sualchhuak nawlh thung a. Kum 14 hnua a vawi khat nan Anfield ah an chak.
Anfield-ah Arsenal an chak
