Ningani zing khan NBA 2024-25 regular season khelh chhunzawm a ni a, inkhel hmuhnawm takah Milwuakee Bucks chuan point 16 laiin Chicago Bulls an hneh. Bulls an hneh tum hian Bucks tan Antetokounmpo chuan point 41 lai a thawkchhuak. Inkhel dangah Cleveland Cavalier in hnehna an chang ve bawk.
Milwuakee Bucks hian Chicago Bulls lakah bul an tan tha viau a, quarter khatna leh quarter hnihnaah point rukin an chungnung ve ve a, point 12 a hmahruai chungin chawlhlawk an hmang. Chawlhlawk hnu lamah Bulls game a kang hret a, quarter thumnaah point liin an chungnung a, an khingpuite nen an inkar an tizim hret. Quarter thumnaah hnufual zawk ni bawk mah se Bucks hi quarter linaah an khel tha zui leh a, point 8 ngawtin an chungnung zui leh ta mai a, Bulls lakah point 122-106 in hnehna an chang zui ta a ni.
Bulls an hneh tum hian Bucks player pawimawh Giannis Antetokounmpo chuan point 41 lai a thawkchhuak a, a chetha hle. Point 41 a thawhchhuah bakah hian ball sawhlet vawi riat a dawn bakah assist vawi kua a nei tling bawk. Antetokounmpo hi season kal mekah a chetha viau a, game khata point 40 chin thawhchhuah vawi thum ngawt a nei tawh. Bucks tan hian Brook Lopez chuan point 21 a thawkchhuak a, Damian Lillard pawhin point 20 a thawkchhuak ve bawk.
Ningani zinga inkhel dangah Cleveland Cavaliers chuan point 128-100 in New York Pelicans an hneh ve bawk. Season tharah vawi 15 zet chak zawn thei Cavaliers hi Boston Celtics in an chak tluang lai an tihsawpsak a. An tlawm hnu lawkah Cavaliers hian New York Pelicans an hmachhawn zui leh a, mit la taka inlan in, hnehna kawng an zawh zui leh nghal.
Cavaliers hian an khingpui Pelicans lakah an khel tha viau a, quarter hnuhnung berah an hnufual ve zeuh tih loh chu quarter hmasa pathumah chungnung zawk an ni vek. Quarter khatnaah point 5 in an chungnung a, quarter hnihnaah point kuaa an chungnun hnuin quarter hnuhnung thumnaah point 8 in an chungnung zui leh a. Quarter hnuhnung berah erawh point liin an hnufual ve thung. Pelicans laka an chak tum hian Cavaliers tana point thawkchhuak hnem ber Ty Jerome chuan point 29 a thawkchhuak.
Ningani zing vek hian Western Conference hmahruaitu Golden State Warriors chuan an khingpui Atlanta Hawks chu point 120-97 in an hneh a, an mualah a zawnin vawi nga an chak zawn ta chiah. Warriors tana point thawkchhuak hnem ber Andrew Wiggins chuan point 27 a thawkchhuak a, Stephen Curry chuan point 23 a thawkchhuak ve bawk.
Antetokounmbo a che bon
