Anthurium Festival nei zo

Ni hnih awh Anthurium Festival 2023 chu Inrinni khan Reiek Tourist Resort-ah khar a ni a, chief secretary Dr Renu Sharma chuan a hmanpui ani.
Chief secretary chuan Best Tourism Village in India 2023 nihna hauh mektu Reiek khuain Anthurium Festival a thleng chu thil inhmeh tak a nih thu sawiin, a lawmpui thu a sawi.
Anthurium Festival chu Mizoram hmun hrang hrang bakah state pawnlam atanga khualzin hiptu pawimawh tak a ni tawh tih sawiin, “Mizo hnam hrang hrang nunphung leh ziarang pho chhuah a ni thin hian hnam ziarang chawinun kawngah nasa takin awmzia a nei a ni,” a ti. Mizoram chu khualzin hiptu pawimawh tak a ni, tiin, “Hnamdangte lo dawnsawn kawngah pawh hma kan sawn zel a, India ram state bakah khawvel ram hrang hrangah tourism industry chu pawimawh tak, ram economy-ah pawh thawhhlawk tak a ni a, helam kawngah nasa lehzuala tan kan lak a pawimawh hle,” a ti.
Anthurium Festival hi chhawng thuma hman a ni a. Chhawng khatnaah a hawnna hun hmangin, chhawng hnihnaah lam leh zaia hun hman a ni a, Mizo infiamna chi hrang hrang entir a ni a. A chhawng thumnaah mipui pualin lam leh zaia hun hman a ni.