US Secretary of State Antony Blinken chuan Gaza a inkahhai leh mitang inthleng tawn theih nana hun remchang tha leh hnuhnung ber a ni thei tiin a sawi.
Blinken hian Thawhtanni khan Israeli President Isaac Herzog nena inbiakna an nei a, nikum October thlaa indona chhuah hnuah Blinken an helai region tum kua a tlawhna a ni tawh.
Kar kaltaa Doha a inbiakna neih a nih hnuah US chuan beiseina sang tak a nei a. Mahse, Hamas te chu an la hmin lo thung a, Israeli sipai te chu Gaza Strip atanga an inhnuhdawh vek an phut a ni.
Nimin vek khan Blinken chuan Israeli Prime Minister Benjamin Netanyahu chu hmuin inkahhai a awm theih nan a nawr zual dawn tia sawi a ni.
“Boruak sosang, inrunluihna leh inremna a awm theih nana harsatna min siamsak tur te hetah leh hmun dangah pawh a awm loh nan theihtawp kan chhuah a ni” tiin Blinken chuan Herzog hnenah a sawi a.
“Tun hi tum kua October 7 atanga Israel leh Middle East ka tlawhna a ni tawh a. Tun hi hun pawimawh a ni a, hun tha ber a ni mai thei a, mitangte kan hruai haw theih nana hun duhawm hnuhnung a ni thei a, inkahhai awm theih nan leh remna leh security tha awm theih nana kawng pawimawh a ni thei,” tiin a sawi bawk.
Tuna inremna a awm theih nana hmalakna hi US ruahman niin Israel leh Hamas tena buaina an neih chinfel a nih theihna tur a ni.
Americans te chuan karleh lam chuan inremna an ziahpui theih an beisei tawh a. Mahse, America beiseina chu Israeli emaw Hamas leadership te chuan an pawmpui lem lo thung a. Inremna awm thei tur tibahlah tuah an inpuh ve ve a ni.
Pathianni khan thuchhuah an siamah Hamas te chuan Israeli Prime Minister Benjamin Netanyahu chu inremna kalh zawnga chet la tia puhin indona tihsei a nih theih nana phut neia bituk lui tlatah an puh bawk a. Inremna tibahlahtu leh palaite khaihlaka siamtu tiin an puh bawk.
Hamas te chuan inremna awm theih nana rawtna siamah IDF te chuan Gaza leh southern Egypt inkalpawhna kawng zimte Philadelphia Corridor-ah sipai tlem zawk dah te pawh a tel an ti a.
Israel chuan nikum October khan Hamas tena a ram chhung lut a, mi 1,200 chuang tihluma mi 251 mitang anga an hruai phuba laka nan Gaza-a Hamas te nuaichimih vek tumin chet a la tan a.
Mi 40,000 chuangin Gaza-ah rignawt nunna an chan phah tawh a, infrastructure tihchhiat a turu hle tiin Hamas-run health ministry te chuan an tarlang.
Nikum November thlaa inkahhai lailawk siamah Hamas te chuan mitang 105 an chhuah hman a, Israel-in Palestinian lung in tang 240 vel a chhuah bawk a. Israel chuan Hamas ten mitang 111 an la kawl tia sawiin chung zinga 39 te chu thi tawha ngaih an ni a ti bawk.
Kar kalta khan US President Joe Biden chuan inkahhai chungchangah ‘Inkahhai kan nei thei tep e’ tiin a lo sawi tawh bawk a ni.
Pathianni khan Netanyahu chuan cabinet meeting kovin chutah chuan mitang te chhuah zalen an nih theih nana hmalakna leh chutih rual chuan Israel security chu ngaih pawimawh ber a ni dawn tiin an sawi a.
“Thil thenkhatah inpawhfan theihna kan nei a, thil thenkhatah inpawhfan theih lohna kan nei bawk a, chu chu kan lantir mai a ni. Heng thil pahnih danglamnate hi kan chiang viau a ni,” tiin a sawi.
Hamas te chu ‘luhlul’ chhuahah puhin militant group te chu nasa zawka nawr ni se tiin a sawi bawk a. Hetihlai hian senior Hamas official thung chuan, “Palaite hnen atanga kan thudawnin min tihnual hle a, hmasawnna a awm lo,” a ti ve thung.
Hamas tena vantlang nawlpui hriata luhlul an chhuahna chu an negotiating tactic a ni thei a, mahse, Hamas leh Israel te-ah inrinlohna lian lutuk chuan inkahhai thlen theihlohna a tisang tia sawi a ni bawk.
US President Joe Biden-an inkahhai a awm theih nan ruahmanna a siam chu thawh thuma kalpui tur niin 27 May daih tawh khan ruahmanna a tlangzarh tawh a.
Thawhkhatnaah chuan kar ruk chhung inkahhai phawt tur niin chutih chhung chuan Israel chuan Gaza a mipui bitna atangin a sipai te a lachhuak ang a, Hamas ten lung in tang te hmeichhia, kum upa leh damlo leh hliam tuarte chhuahin Israel-in Palestinian mitang te a chhuah bawk ang.
Thawh hnihnaah chuan mitang la dam tin te chhuah zalen vek a ni ang a, indona tihtawp hlen tur a ni bawk a.
Pathumnaah chuan Gaza-a major reconstruction kalpui nghal tur a ni ang a, mitang thi tawh te pawh an ruang te Israel hnena pek let tur a ni bawk.
Hetih lai hian Gaza a Hamas-run health authority te chuan Pathianni khan Israeli strike avangin mi 21-in nunna an chan tia sawiin nunna chan zinga paruk chu naupang an ni an ti bawk a.
IDF te pawhin Pathianni khan southern Gaza city Khan Younis atanga Israel rocket launcher a beihna chu an tichhia tia sawiin an puang ve tho bawk.
Antony Blinken-an beiseina sang tak nei
