Indian Army chuan Chinese People’s Liberation Army (PLA)-ten Arunachal Pradesh an luah a, India chhungah camp an din nia sawi chu hnawlin ‘thu dik lo leh tanchhan awm lo’ tih an sawi.
Chanchinbuten Arunachal Pradesh-a vantlang pawl pakhatin sorkar thuneitu hnena memorandum an thehluhah kum eng emaw zat kalta chhung khan an state chhunga ramri hnaih kilkhawr tak takah Chinese sipaiten an awm hmun an tihzau zel nia an ziah an tar lan atanga chhuak a ni.
Indian Army chuan, “Tun hnaia Chinese PLA-ten an ram luah dan leh Arunachal Pradesh-a camp an siam nia sawi chanchinbu thenkhatah kan hmu a. Heng report-te hi a dik lo va, tanchhan pawh a nei lo,” an ti.
Arunachal Pradesh-a Upper Subansiri district-a Taksing-a vantlang huap pawl, Nah Welfare Society (NWS) chuan deputy commissioner hnenah memorandum an thehlut a, hetah hian PLA-ten India leh China ramri bul, India chhungah camp an siam niin an tar lang a ni.
June 26, 2024-a lehkha an thehluhah hian kum 10/15 kalta chhung khan Chinese sipaite chuan Taksing huam chin ramri bula hmun hrang hrangah luahin an awmhmun pawh an tizau zel niin an ziak a ni.
Memorandum-ah hian tual chhung miten ramsa an pelhna, ran an tlantirna hmun leh ramngaw atanga thil lak khawm nana an hman thin hmunah kawngpui, lei leh sipai camp siam a nih thu an tar lang bawk.
NWS hian hmun nga – Chujarta-a Oying, Paniar, Marpan (Marnafe), Potrang Lake leh Tindingtang (TG) te chu kum 2020 atang khan Chinese-te awpna hnuaia awm niin an tar lang a, hmun thenkhat hi Taksing khawpui bula awm a nih thu leh tual chhung mite tan nunphung leh sakhaw thila hmun pawimawh tak a nih thu an sawi bawk.
Vantlang huap pawl hian Arunachal Pradesh sorkar leh sorkar laipui chu ramria China hmalakna nia an sawiah inrawlh nghal turin an ngen a. Indian Army-in ramri humhalh tura an inpekna an ring tih an sawi rualin memorandum-ah hian ‘India’ tia an sawite hum nan chak zawka hmalak a ngai tih an tar lang tel.
Lehkhaah hian district thuneitute chu ramri kaihhnawih thuneitu hnena thlen turin an ngen a, an pawlin an thusawi thlawptu nia an sawi thlalak te pawh an thehlut tel bawk.
Indian Army-in Thawhtannia NW-in memorundum an thehlut atanga thu darh chhanna atana thuchhuah an siamah Chinese sipaiten an luah nia an sawite chu chiang takin sawi lo mah se camp an din nia sawi erawh chiang takin an hnawl thung.
Ramria thu thar awm hi India leh China ten Beijing-a India-China Border Affairs chungchanga Working Mechanism for Consultation & Coordination (WMCC) thutkhawm vawi 35-na an neih hnu lawka chhuak a ni.
Thutkhawmah hian Indian external affairs ministry chuan an inkawmna chu ‘siam thatna leh hma lam hun thlirna’ a nih thu a sawi nghe nghe.
Ministry-in inbiakna chungchanga thuchhuahah a siamah India leh China ramria thil awm dan an thlirho va, remna leh muanna vawnhimna kawnga hmasawnna a awm chu an lawm thu an sawi a, hei hian ram pahnihte inlaichinna chu zawi zawiin a pangngaia siam a nih theih nan hma a sawn tih an tar lang.
Ram pahnihte hian ramri vawn dan tur te, inrintawn chunga ramri kaltlanga thawhhona neih dan tur te an sawiho bawk a. India chuan Trans-Border Rivers chungchanga Expert Level Mechanism chu a hma lama thutkhawm a tul thu a sawi bawk.
AP-ah Chinese sipai inbun anga sawina Indian sipaiten pha
