AR chhuahna tur tihfel vangin
ZPM Zonu leh Thalai an lawm
Aizawl laili atanga Assam Rifles chhuahna tura inremna – memorandum of agreement (MoA) ziahfel a nih tak avangin ZPM Zonu leh ZPM Thalai chuan chief minister Lalduhoma hmalakna chhuanawm an tih thu an sawi.
ZPM Zonu Hqrs. chuan chief minister hi a office-ah kalchilhin an aiawhin an president R Lalawmpuiin Tawlhloh puan a bah tir a. Kum tam tak chhung sawrkarna lo chelh tawh party-ten theihtawp chhuaha an lo beih tawh, hlawhtling thei lo, ZPM kaihhruai sawrkar thla 10 leka upa-in Assam Rifles insawn chhuahna tur MoA a ziahpui thei mai chu sawrkara a hotu ber Pu Lalduhoma leadership rintlak zia leh that zia tarlannaah kan ngai tih an sawi.
‘ZPM Zonu chuan a taka hna thawk mi chief minister kan nei hi a lawmawm kan tiin, a thlamuanthlak kan ti a. Chief minister Pu Lalduhoma leh a kaihhruai ministry chu ram leh hnam tan nghet taka ding zel tur leh leh tawlh lo turin duhsakna kan hlan a; ram leh hnam tana sawrkarin ke a penna kawngah Zonu chuan sawrkar a thlawp zel dawn a ni,’ a ti.
ZPM Thalai Hqrs. pawhin, kum 37 chhung ram hruaitu hmasaten Assam Rifles insawn chhuahna turin theihtawp lo chhuah tawh thin mah se, sipai sawn chhuah chu thil harsa tak a nih laiin, chief minister-in remhre tak leh fing taka hma a lakna zarah AR insawn chhuah dan tur an rel thei chu chief minister hi an chhuang takzet tih a sawi.
Chief minister-in forest reserved avanga hmasawnna neih tur thuanawp /pamtul mai theia ding mek buaipuiin, kawngpui tha leh zau kan mamawhna hria a, central lamah theihtawp chhuaha fing leh remhre taka hma a lakna azarah Forest department leh land owners hnenah sawrkar laipuiin zangnadawmna a pek ve ve dawn avangin CM hmalakna an chhuang takzet tih ZPM Thalai hian a sawi bawk.
AR chhuahna tur tihfel vangin ZPM Zonu leh Thalai an lawm
