Mizoram sawrkarin a tihtur a la tih kim loh avanga Assam Rifles te la insawn thei lo anga tualchhung chanchinbu pakhata tarlan chungchangah H. Lalengmawia IAS, Commissioner & Secretary, Home Department chuan, Aizawl khawpui laili atanga Assam Rifles sawn chhuahna tur hmun Zokhawsangah Mizoram sawrkar chuan a tihtur chin chu a ti vek tawh tih a sawi.
“Sawrkarin a tihtur a tih vekte kha a lo tha lo leh hman tawh a, chumi enkawl zui chu anmahni (AR) mawh a ni a, chu enkawlzuina lamah chuan hma an lak chak loh avangin thil saw a lo awngrawp ta viau zawk a ni,” Home Commissioner chuan a ti.
Assam Rifles lamin harsatna lian bera tui an chhuanlam chungchangah Home Commissioner chuan, tui hi PHE lamin an mamawh aia tam an pek avangin AR lam hian ‘bill a san phah’ tiin home department-ah an rawn sawisel zawk a ni, a ti a. Aizawl mipuiin chawhruala mi pakhat zelin tui litre 60 vel an dawn laiin Zokhawsanga AR te chuan chawhrualin nikhatah mi pakhatin tui litre 100-300 an dawng zawk a ni, a ti.
Transformer chhia siamthatna tur chungchangah P&E deptt lamin estimate an siamsak a, sum chu AR lam tum tur niin chu chu P&E deptt kutah a la lut lo niin Home Comm’r chuan a sawi a. AR-te duh dana Zokhawsang chawmtu 33/11KV Sub-Station Mualpui ami, Zokhawsanga sawn chhuah chu JERC Electricity Supply Code Regulation 2013 Clause 5.7 in a sawi angin thil theih a ni lo, a ti bawk.
Zokhawsang panna kawngpui thawmthat chungchangah, MHA lamin state sawrkar a la rawn hriattir lo niin Home Commissioner chuan a sawi a, 2020-a kawngpui siamthatna state sum vbch 11.15 pawh Central sawrkarin a la rul lo niin a sawi bawk.
Draft MOU chungchangah, September ni 8, 2023 khan Mizoram sawrkar chuan MHA hnenah comment a thawn tawh a, MoU hi Delhi-ah AR te nen dawihoa tihfel chu MHA-ah a rawt nghe nghe niin Home Comm’r chuan a sawi a ni.
AR insawnna turah sawrkarin a tihtur a ti vek tawh: Home Comm’r
