Aizawla Assam Rifles chhuahsan tak ram huamchhunga kawngpui laih zauh tumnaah thing 23 dang kih belh theih a ni dawn.Assam Rifles ram chhuahsan takah sawrkarin Bazar Bungkawn to Treasury Square inkar metre 14-a thui kawngpui zauh a tumnaah thing ding sa engemaw zat kih a ni a, he thil hi environmental activist hoin duh loin thing kih belh an remti loa, Centre for Environment & Social Justice chuan pawl angin hma an la bawk.
Gauhati High Court Aizawl Bench-ah public interest litigation (PIL) thehluh a ni a. He hna thawh mek pawh hi court thu angin tihtawp zui a ni.
High Court chuan he thu hi ngaihtuah zuiin, sawrkarin an ukil kaltlanga an sawi danin, thing ding sa 170 chu kih tura tih a ni a. Ennawn a nih hnu ah thing 63 chu hum theiha ngaiin, thing 107 zawk kih tura tih a ni. Court-in thing kit rih tawh lo tura a tih hian thing 44 kih a ni tawh.
Hetianga thing kih ngai lo ho paih a nih hnu ah hian, kawngpui zauhna tura kih ngei ngei ngai chu thing 23 a la awm tih sawi a ni a. Court-ah hian AR ram chhuahsan takah hian UD&PA department chuan thing tiak 2000 phun tharna atan a tul anga hman turin Rs. 47,34,000 ruahman a ni tih pawh sawi a ni.
Boruak tha neih zelna atan leh tunlai sik leh sa inthlak danglam nasa in khawvel kalphung a nghawng nat dan, hemi kaihhnawiha Supreme Court thu remna dinglai awm mek nena enkawpin, AR ram chhuahsana thing ding sa a tlem thei ang ber kih chu thil tul nia a ngaih thu High Court hian sawiin, thangthar lo awm lo la awm zel turte tan he thil an rawn thehluh hi ngaihpawimawh a tul tih a sawi a. Sawrkarin hma a lakna atana thing 23 tal kih a la ngaih thu a sawi erawh remtih sak chungin, he PIL hi tihtawp a ni tih a sawi.
Thing kih loh tur zingah hian Lammual main gate bula Bung kung dinglai pawh hi a tel tih court-ah hian sawi a ni.
AR ram chhuahsan taka kawng laih zauh tumah thing 23 kih belh dawn
