Arab rama mi awmpui ni tura intirh danah thil fel lo inphumru a tam a, Mizoram sawrkara atanga chhui chinah duhkhawp lohna a tam bawk avangin, sawrkarin a chhui tur hnamdang police officer – IPS ngei ruat se a duh tih heng mite harsatna buaipui thintu Lalremsangi Fanai chuan a sawi.BJP Mizoram thupuangtu ni bawk Lalremsangi Fanai sawi danin, housemaid tura kalte hi an agency-ten an tawngkam thiamna hmangin an bum hneh hle a, agency neitute an zahin an thu kal lam haw lam an ring hle. Housemaid-a kalte hi a tlangpuiin chhungkaw harsa tak, thawhchhuah neia chhungkaw changkan ve theihnana rampawna kal an ni tih a sawi.
The Mizoram Private Placement Agencies (Regulation) Act 2015 in a sawi “Beyond the boundaries of the State of Mizoram” tih chu inhnialna tura pawimawh ber a ni loa, district deputy commisionner leh superintendent of police ten placement agencies leh housemaid-te chunga Act & Rules chhunga an mawhphurhna kenkawh chungchangah an tih tur an ngaipawimawhlo a, harsatna bul tanna chu controlling authority-te hi an ni tih a sawi. “Agency-ten dan hnuaia thil ti anga insawiin, dan an bawhchhe fai vek a, security awm loa mihringa sumdawnna an kalpui lui tlat hian buaina leh harsatna namen loah Mizo nulate hnuklutin, mi ramah inchhanchhuah ngaiin kan awm ta a ni,” a ti.
Middle East-a housemaid-a intirhnaa harsatna chungchangah Mizoram DGP-in a lo ngaihpawimawh sak viau laiin, ama thurawn anga kum 2023 August 17-a Aizawl SP hnena FIR an thehluh tumah erawh SP-in a lo dawnsawn danah a tuartu lam chu an beidawng haw viau tih a sawi a. SP CID (Crime) lamin an lo ngaih thutak sak a, chak takin an bawhzui naa, tu dawhkan berah nge a tan rei tih hriat harsa khawpin file a kal sak zui thin hle tih Lalremsangi Fanai hian a sawi. Hei mai hi ni loin, a tuartute statement lak danah a duhkhawp awm lo hle a, case chhuitu officer hmeichhe pakhat phei chuan agency-te lam aiin a tuartute man theihna lam a lo sawi vawng pui daih avanga hlauhlawpa an rawn haw hmuh chuan, case chhuitute thlak tul tihna a len phah hle tih sawiin, “Neutral leh fair taka investigation ti tur Vai IPS ruat se, tih hi Home minister ka ngenna leh phut a ni,” a ti.
Housemaid issue case kal lai chu a serious a, an manganna case serious tak hian tute dawhkan atangin nge ngaihpawimawh a hlawh tawk loh tih chu hriatchian a tul tih a sawi. “Agency-te hi ram pawna dan loa mihring thawn chhuah case, The Emigration Act 1983, The Mizoram Private Placement Agency Act, kum tlinglo hna thawk tura ram pawna thawn, passport siam tura document tihdanglam leh dan loa mihring hmanga sum leh pai hlawkna tel tuma sumdawndawnna (human trafficking) case te pek ngei tur an ni,” a ti bawk.
Arab rama hna thawk tura intirh dan chhuithat ngen
