Daily Newspaper

Argentina hneh loin Siami leh a thiante an tlawm

10

Nimin Oi Hockey Stadium, Tokyo-a Olympics women’s hockey tourna-ment semi-final pakhat zawkah India chuan 1-2-in world No. 2 Argentina an hneh lo a, naktuk third-fourth place play-off match-ah Great Britain nulate nen pathumna an inchuh dawn.

Hmeichhe hockey semi-final lehlamah Netherlands chuan 5-1-a Rio Olympics champions Great Britain sawpin final an lut ve bawk.

Indian hian huaisen takin team tha Argentina an hmachhawn a, minute hnihna lekah penalty-corner hmangin Gurjit Kaur chuan hmahruaina goal pawh a thun mai a, mahse, hminglema Las Leonas an tih Argentina women’s national field hockey team hian khawng takin an beilet a, minute 18 leh 36-ah an captain Maria Noel Barrionuevo chuan penalty-corner atang ve vein an siphurh sutna leh final an luhna goal a vawlut a, Thawhtanni quarter-final lama sikhat faia Olympic vawithum champion ni tawh Australia hnehtu India nulate hian final an lut zo ta lo.

South American team-in ball chang tam zawk mah se Lalremsiami telna India team hian team ropui lakah goal an thun hmasa a; Argentina-in first quarter-ah vawi duai lo nawrbet mah se goal chance tha an siam-chhuak mai thei bik lo.

India-in an chance neih vawi-khatnaah an thun nghal thung a, penalty-corner atangin Gurjit chuan a thun a, a vawikhatna atana final lut turin bul an tan fuh zawk.

Si an phurh hnuah erawh Argentina lamin inkhel an thunun nghet hmiah a, na taka goal zawng chungin Indian defence an chhaihbuai reng a, Argentina attack tam zawk hi veilam sir atanga intan niin, Barrionuevo chuan India tlawmna goal hnih a vawlut ta a ni.
Netherlands 5-1 Great Britain

Semi-final match hmasa zawkah world champion ni mek Dutch nulate’n Olympic women’s hockey title kawl mektu Britain nulate an vawchhuak a, Netherlands hian 2016 final penalty shootout-a an ngam loh GB lakah inkhel thunun chungin phuba an la nawn leh.

Karhmasa khan group stage lamah Netherlands hian tun aia goal thun tlem zawk chungin Olympic hmeichhe hockey champion lai hi an lo hneh tawh a, inkhel pawimawh zawkah a hma aia chiangin an hneh nawn leh a, tournament kal laiah an tumpui apiang la hneh vek chungin goal thum chiah a la chhuah.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy