Argentina far-right president thar chuan office a luah hnua a thusawi hmasak berah economic ‘shock treatment’ an kalpui tur thu a sawi.
Javier Milei chuan Argentines te chu hrilhlawkin ‘Pawisa a awm lo’ a ti a, chuvang chuan insiam tha turin austerity measures khauh tak an lak a ngai dawn a ni, a ti a. Pathianni kalta khan Buenos Aires ah Milei chu president atan lakluh a ni.
‘Tlakranna kum tam tak awh tawh’ chu kan siam tha ang tia sawi bawkin chumi tur chuan sum hmanna tihtlem te, leiba tihtlem te inflation tihhniam te an tum hmasa dawn tiin a sawi bawk.
“Thil chiang tak chu austerity lo duhthlan tur a awm lo, shock treatment kalpui loh theih loh a ni,” tiin Milei chuan a sawi bawk a.
“Hun rei lo te chu a hma aiin kan chhe zawk ang a, mahse, a hnuah a rah kan ei thung dawn a ni,” tiin a sawi bawk a.
Milei chak nan hian pawimawh ber pakhata ngaih chu a farnu Karina a ni bawk a. Dinhmun pawimawh tak a chelh rin a ni bawk.
Milei hi tu khawkha hriat loh atanga Argentina-a office sang ber chelh thei niin right-wing platform te chu hmang tangkaiin nau tihtlak te duh lo a ni a, gun law siamthat te pawh a tel.
A campaign lai atang tawhin US President hlui Donald Trump te leh Brazilian President hlui Jair Bolsonaro te nen an auhla leh thil kalpui tum dan inang hlea sawi a ni bawk.
A campaign laiin Argentina currency dollar-a thlakin an ram central bank chu tihtawp a intiam bawk a.
Presidency chuan thuneihna sang tak a keng tel chungin Milei chuan harsatna hrang hrang chinfel a tumna kawngah dodaltu tam tak a tawk dawn tho thung.
Argentina currency Peso chuan a hlutna a hloh zel a, retheihna pawh 40% velah sang tawhin economy chuan depression thuk tak a tawng mek bawk.
Milei hian Argentina Congress ah minority representation tlemte chauh a neih avangin right-wing leh libertarian party te chuan an bei hle tura ngaih a ni.
Eng tiangin nge a auhla tam ber te chu a takin a kalpui dawn hriatchian mai theih a ni lo va, observer thenkhatte chuan hnehna a chan hnuah a thu leh hla a zuai tawh an ti thung.
Mahse, a tih hmasak ber pawlah erawh a sawi angin sorkar departments tih tlem chu kalpui nghalin 18 atangin pakuaah a tihniam nghal thung.
Argentina President Milei-an ‘Shock treatment’ a ngai ti
