Hliam avangin El Salvador leh Costa Rica nena friendly match khel tur Argentina squad-ah Lionel Messi telh a ni lo.
Karliamta Concacaf Champions Cup inkhel pakhata Inter Miamia-in 3-1-a Nashville an hneh tum khan second half tir lamah Miami captain hi a kaihza dinglam na avangin lakchhuah a ni a, Inrinni league-a D.C. United an hnehna game-ah pawh a inlan thei lo a; tun Thawhtanni khan Argentina FA chuan friendly match an khelh tur pahniha an captai khelmual luh ve theih loh tur thu hi an nemnghet ta a ni.
Inter Miami CF coach Gerardo ‘Tata’ Martino chuan a star player inhliam hnu lawk khan Messi dinhmun endik reng a nih tur thu leh chawlhkar tin a hmasawn dan an zirchian tur thu a sawi.
Kum 36 mi ni ve tawh Messi hi tunkar Zirtawpni Philadelphia khaw friendly match-a El Salvador hmachhawn tur leh ni li hnu Los Angeles khaw friendly-a Costa Rica infiampui zui leh nghal tur Argentina squad-ah telh a ni zet a, AFA chuan an captain tel loa an chetchhuah a ngaih tur thu hi an puang zui ta a ni.
ESPN Argentina tarlan danin, Messi hian tunkar tawp lamah national team chu a luhchilh tho mai thei a, mahse, inkhel tur ni loin Argentina medical staff-te enkawlna dawng turin a ni thung dawn a, chumi hnuah Florida lam a pan chauh ang.
Pathianni khan Manchester City striker Julian Alvarez telin Argentina player engemawzat chuan friendly match an khelhna tur khawpui pakhat zawk Philadelphia an thlawklut tawh a, a nawlpui chuan nimin khan an zawm ve leh ta a ni.
Kumin June leh July thla hian South America khawmualpui ramte football-a inelna pui ber Copa America chu US leilungah nghah a ni dawn a, defending champion Argentina pawhin tournament khelhna tur ramah ngei hian warmup match khelh an titlu a ni.
Argentina hian hliam avangin striker Paulo Dybala leh midfielder Exequiel Palacios pawh an chhawr thei dawn lo.
Argentina tana inlan lo tur Messi
