Ariana Grande ‘Eternal Sunshine’-in double Platinum a kai

Ariana Grande ‘Eternal Sunshine’-in double Platinum a kai
Ariana Grande album ‘Eternal Sunshine’ chu kum hnih hnuah pawh a la êng zual zel a, Recording Industry Association of America (RIAA) Platinum Certification a kai ta a, he album-a a hla “Intro (End of the World)” leh “Supernatural” ten Pathianni kalta khan RIAA Platinum certification an kai thar ve ve bawk. RIAA Platinum certification hi US-a album emaw hla emaw copy maktaduai hralh tlin theih chhinchhiahna a ni.
Ariana album ‘Eternal Sunshine’ hi 2024-a a tlangzarh kha niin, Billboard 200 (US albums) chart-ah No.1 a kai a, he album-a a hla “Yes, And?” leh “We Can’t Be Friends (Wait for Your Love)” te chu Billboard Hot 100 (US singles) chart-ah No.1 a kai ve ve bawk a, “Yes, And?” pawh hian RIAA double Platinum kaiin, “We Can’t Be Friends (Wait for Your Love)” pawhin 4x Platinum a kai tawh bawk bawk.
‘Eternal Sunshine’ album hian kum hnih chhungin double Platinum hi a kai thei a, a album tlangzarh kumah, thla tlemte chhungin, September 2024-ah Platinum a kai nghal a, kum hnih chhungin 2x Platinum a kai zui a, a album kum hnih tlin champha pualin Grande chuan Instagram-ah, “eternal sunshine kum hnihna a lawmawm e. ka project neih tawh zingah ka duh ber a la ni. min duhsakna avangin ka lawm e,” a ti.
Ariana Grande hian ‘Eternal Sunshine’ album support nan tour neih a tum mek a, June thlaah a kick-off ang a, August-ah a hmawr bawk leh hman a tum a, Los Angeles, New York City leh London bakah khawpui lian zualte a hrut dawn a, he tour hi a zawh fel hunah chuan live performance a chawlhsan deuh vang vang dawn a nih hmel a, “Tuna tan chuan a tawpna a ni rih ang,” a lo ti tawh tlat.
Nikum November thlaa Amy Poehler nena an inkawmnaah live performance chawlhsan a tum thu hi sawiin, “Kum 10 emaw 15 emaw lo awm leh tur hi chu a danglam tawh ngawt ang. Heng tour lian vak lo an tih vel te hi ka phur thin a, mahse, rei tak chhung chu ka ti tawh rih loin ka ring a. Chuvangin tun tumah hian tha tawp kan chhuah ang chu,” tiin Eternal Sunshine tour a neih tur chungchang hi a lo sawi lawk tawh a ni.