India rama Sports chawimawina sang ber dawttu Arjuna Award 2025 chu Mizo nula hockey player Lalremsiami Hmar chuan a dawng ta ruau mai le! Mizo mipui ten kut kan beng e!
Ministry of Youth Affairs and Sports chuan nimin khan sports discipline hrang hranga chawimawina dawngtu mi 17 hming a puang a, Indian Women’s Hockey Team atangin forward Lalremsiami leh, Indian Men’s Hockey Team midfielder Rajkumar Pal te hming a lang a. Sports chawimawina sang ber “Major Dhyan Chand Khel Ratna” dawngtu erawh kuminah hian an awm lo. Chu lam chu duhtawk ang.
Heti hian, nula Lalremsiami hi Mizoram chhul chhuak zinga ram pum huap sports chawimawina sang ber dawttu Arjuna Award dawng thei awmchhun” tiin a sawi theih ta tihna a ni.
Football lamah Jeje Lalpekhlua kha Arjuna Award dawng turin vawi thum lai nominate a ni chung khan a dawng thei ta lo va. Khati khawpa performance nei tha, nomination pawh tum thum zet hmu si khan a dawng ta tlat lova, a uiawm hle. Heta tang hian Arjuna Award hi a ‘namai lo’ hle tih a hriat theih a ni.
Lalremsiami pawh hi kum 2023 khan nominate a lo ni tawh a, tunah a hmu ta a ni. Mizote leh Mizoram State hming tithatu a ni a, a chhuanawm hle a ni.
Mizote hi hlawhtlinna inlawmpui thiam leh inlawmpui uar tak kan ni a, Mizoram huapa intihsiakna leh inelna hrang hrang, sports a ni emaw, zai a ni emaw, comedian search a ni emaw, pakhatna, pahnihna leh pathumna mai ni lo, top ten thlengin kan inngaihhlutsak a, a khaw nawtin kan inhmuak a, kan inchawimawi a, ruai te hial kan theh mup mup thin.
Tuna Lalremsiami sa lu rawn hawn hi a theuneu lo a, chawimawi a phu a, lawmsak a phu. Chu lam chu hmangchang hre tak tak ram hruaitute leh sports lam buaipuituten a tih dan an hre leh em em ang tih hriatsa a ni.
Nula Lalremsiami hian hetiang chawimawina sang dawng tur ngawr ngawr hian a bei lo a, a kawngzawh tur intlansiakna a thlan fel tawh lamah chuan hnunglam hawi kir tawh lovin hma lam chauh thlir in, theihtawp chhuahin a bei ngar ngar a, ‘Heaven helps those who help themselves’ tih chu a takin a lo thleng a ni. A thawhrim rah chu amah chauh pawh ni lo, Zofaten a zar kan lo zo ve ta a ni.
Nula Lalremsiami hlawhtlinna hian thalaite-ah phurna leh chona thar siamin no-tê tam tak hring chhuak zel rawh se, tih hi kan duhthusam a ni e!
Arjuna Awardee Nula Lalremsiami
