Daily Newspaper

Armed Forces Flag Day-ah sipai zahna lantir ang – Larsap

10

Kumtin December 7 hian ram pum huapin Armed Forces Flag Day hman thin a ni a. He ni hi ram venhim hna thawktu sipaite leh tuna sipai ni mekte mipuiten kan thlawp tlat a ni tih lantirna a nih bakah anmahni chawimawina leh zahna lantirna hun a ni tih Mizoram larsap PS Sreedharan Pillai chuan a sawi.

He ni pual hian larsap hian thuchah a siam a. Sipaite chu ram mipuite venghimtu leh kan thlamuanna an ni, tiin, ‘An ni hi vur hnuaiah leh khawvawt karahte, ei leh in tur mumal awm remchan lohna hmun bakah hun khirhkhan tak tak karah pawh ram tan rinawm taka ding tlat thin an ni. Engtik lai pawhin khawmualah, tuipui chungah leh boruakahte kan ram venhim hna an thawk reng a. Armed Forces Flag Day-ah hian sipai chi thum – Army, Navy leh Air Force a thawk, kan nula leh tlangval huaisente, kan ram ropui tak venghim tura nunna hlantute inpekna te hrethar leh turin ka chah a ni,’ a ti.

Armed Forces Flag Day pual hian khua leh tui zawng zawngte chu tanpuina thilpek phal taka pe chhuak turin a sawm tih a sawi. Armed Forces Flag Day hman chhan langsar zual zingah, indona hmuna sipai thi, hliam tuar leh indona in a nghawng avanga harsatna tawk sipaite dinhmun siamthat; ex-Servicemen leh an chhungkuaten in leh lo an dinthat leh theihna tura tanpui leh ex-Servicemen leh an chhungte tana hamthatna ngaihtuahsak, leh, sipaia tang mek leh an chhungte puala hamthatna ngaihtuahsakte a ni tih a sawi.

Mizoram chief minister hlui pathum chu sipaiah an lo tang tawh tih a hriatin chhuanawm leh ngaihsanawm a tih thu PS Sreedharan Pillai hian a sawi a. ‘Hei hian India ram venhimna kawngah Mizote an thawhhlawk zia a tilang chiang a. Ram vehimna kawngah hian Mizo mipuite hi kan duai lo hle a, zah pawh kan phu hle in ka hria,’ a ti.

Ram thuneihna, kan inpumkhatna leh zahawmna humhim tura sipaite mawhphurhna chu a pawimawh takzet tih sawiin, ram mipui venghim tura sipai chi hrang hrangte inpekna chu ropui a tih thu a sawi.

‘Kum danga tih thin ang thoin, kumin Flag Day pual hian Mizoram pumah vehbur khawn mek a ni a. Khua leh tui zawng zawng – sawrkar hnathawk te, sumdawng te leh mimal tinte pawh kan sipaite puala thawhlawm thawh theuh turin ka sawm a. He ni pawimawh takah hian tam leh hnam venhimna atana nunna hlantute zahna chibai buk thar lehin an kalsan tak – an chhungte tha taka lo tuamhlawm hi kan mawhphurhna a ni tih hre thar leh ang u,’ larsap hian a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy