Daily Newspaper

Armenia leh Azerbaijan ten indo hmachhawn thei

7

Khawvela intihbuaina upa ber pawl chu Armenia leh Azerbaijan te ram inchuh niin tun hnaiah inbeihna nasa ber a thleng zui a ni.

Pathianni khan ram pahnih tena Nagorno-Karabakh region an inchuhna avangin mi 23-in nunna an chan phah tawh a.

He lai hmun hi Azerbaijan ram angin khawvelin a hriat ni mah se, ethnic Armenians ten an thunun thung.

Kum 1990 chhova an inthen khan he region inchuhna avang hian mi sang tam takin nunna an chan phah a ni.

Azerbaijan President Ilham Aliyev chuan he region hi an thunun theih vat a beisei thu a sawi a.

Azerbaijan hmun thenkhat bakah Armenia leh Nagorno-Kabakh ah te tharum thawhna a nasat em avangin martial law puan zui a ni bawk.

Caucasus Mountains a intihbuaina hi kum sawm thum chuang chinfel lohin a awm a, inbeihna a khat tawkin a thleng fo bawk.

July thla khan ramria intihbuaina avangin mi 16 in nunna an chan phah tawh bawk a. Hei vang hian Azerbaijan capital Baku-ah punkhawmna nasa ber thleng zuiin region hi laklet leh an ngiat a ni.

Tharum thawhna hluar thei chuan hlauhthawnna siamin a chhan chu South Caucasus hi oil leh natural gas Caspian Sea atanga world market a pekchhuahna hmun ber a nih vang a ni.

Turkish President Recep Tayyip Erdogan chua Azerbaijan a thlawp thu a sawi a. Azerbaijan hi Turkic mipui tamna ber niin Turkey nena inzawmna thuk tak nei a ni.

Armenia erawh Russia nena inhnaih niin Russia chuan inkahhaina puang turin leh boruak timuanawm tura hma la tura ngenna a siam nghal thung.

UN Secretary-General Antonio Guterres chuan buaina thleng chu a ngaihmawh thu sawiin inbeihna titawp turin a ngen ve ve a. Armenian community tamna France chuan inkahhai puanga inbiakna nei nghal turin a ti bawk a. Azerbaijan leh Armenia ramri Iran chuan palai hnathawh a inhuam thu sawiin US President Donald Trump chuan US chuan tharumthawhna thleng tihtawp a duh thu a sawi bawk.

Armenia’s defence ministry chuan Nagorno-Karabakh a civilian te awmna chu beih a nih thu sawiin regional capital Stepanakert pawh beih zingah a tel thu a sawi a.

Nagorno-Karabakh a seperatist authority te chuan mi 18-in nunna an chan thu leh chung zingah chuan hmeichhia leh naupang an tel thu sawiin hliam tuar 100 chuang an awm thu an sawi bawk.

Azerbaijan thung chuan chhungkaw pakhata member panga te chu Armenia laipui mu in a tihhlum thu an sawi thung.

Armenian Prime Minister Nikol Pashinyan chuan Azerbaijan te chu ruahmanna fel tak siama chet laah puhin ‘Kan sacred homeland humhim turin inring rawh u’ tiin a sawi zui nghal bawk a.

Pathianniah inbeihnaah Armenia chuan helicopter pahnih leh drone pathum an kahthlak thu leh tank pathum an tihchhiat thu a sawi bawk.

Azerbaijan defence ministry chuan helicopter pakhat hlohin a crew te erawh an damchhuah thu a sawi a, Armenian defence system 12 an tihchhiat thu a sawi thung.

President Aliyev chuan Armenian army tena an beih hmasak avangin nasa taka beilet tura thupek a pek thu a sawi bawk a. “Kum 30 chuang dik lo taka kan ram an luahna ata kan umchhuah theih kan beisei,” tiin a sawi bawk.

Nagorno-Karabakh
# Tlang ram 4,400 sq km (1,700 sq miles) a zau a ni.
# Christian Armenians leh Muslim Turks te chenna a ni.
# Soviet Union hunlai khan republic of Azerbaijan hnuaiah autonomous region a ni a.
# Khawvelin Azerbaijan ram chhungah a pawm a, mahse, a mipui tam ber te chu ethnic Armenian an ni.
# Kum 1990 chhovaa indona avang khan mi maktaduai khat chenna nei lova siam niin mi 30,000 chuangin nunna an chana ngaih a ni.
# Seperatist te chuan kum 1990 indonaah khan a chehhvelah ram laka awpzui an nei nual bawk.
# Kum 1994 khan inkahhaina siam a ni a, tichungin buaina a awm reng tho. Russia chu Armenian lam tang anga ngaih an ni.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy