January 8, Ningani zan khan English Premier League 2025-26 khelh chhunzawm niin inkhel ngaihven hlawh tak a awm a. Emirates Stadium-ah table a hmahruai mektu Arsenal leh champion lai Liverpool te an inhmachhawn. Inkhel ngaihven hlawh takah goal thun thei an awm lova, goal awm lovin an inhnehtawk. An mualah an chak zawh loh vangin Arsenal in point 8 a san fal theihna hun tha an neih an chhawr tangkai thei lo.
Table-a hmahruaitu Arsenal leh EPL champion lai Liverpool te hi tunhnaia khel tha dun tak; point hmu zel mai an ni. Liverpool hi game 9 chhung tlawm nei lova kal tluang mek an ni a, Arsenal tan meuh pawh an tawh a khirh dawn tih hriat sa a ni. Liverpool tan pawh season kal meka inelna hrang hranga khel tha tluang tak Arsenal luh khung chu thil chakawm tak a ni bik lo.
Emirates Stadium-ah Arsenal in an khel tha a, ball chang tam zawk leh hlauhawm zawk an ni. Chawlhlawk hma minute 45 chhungin khel tha zawk ni mah se goal an chhuah teuh viau thung. Defender William Saliba leh si nghak David Raya te inman tawk loh vangin Reds in goal an thun teuh hle. An defender te chet ran vangin Gunners hi an him hram a. Hla de de atanga Conor Bradley pet tha tak chuan vanneihthlak takin goal bar a per hlauh bawk a, Arsenal an him thei hram.
Chawlhlawk hmain goal lut awm lo mah se inkhel hmuhnawm tak a ni reng a, chawlhlawk hnu lamah pawh inkhel a hmuhnawm chhunzawm zel bawk. Goal thun ngei tumin an innawr tawn nasa viau a, hlauhawm pawh an insiamchhawk zak zak. Inkhel pawimawh tak hi rin aiin a boruak tang lo mah se hun tawp dawnah erawh rik laih a awm thung. Bench atanga lut Arsenal forward Gabriel Martinelli chuan hliam vanga mu reng Liverpool defender Conor Bradley chu khelmual pawnah a nemchhuak. Hei hian boruak a siam laih a, Martinelli hian yellow card a hmu nghe nghe. Conor Bradley hi zawnchhuah a ngaih zui leh tak si vangin hemi tuma Martinelli chet dan hian sawi a hlawh zui hle.
Inkhel a zawh hnuin Conor Bradley lakah mawi lo taka che Martinelli chuan thupha a chawi a, Conor nen pawh thu an inthawn tawn thu a sawi. Martinelli chuan Conor chu khatiang taka na a ni tih a hriat loh thu a sawi a. A chet dan atthlak tak vanga a inchhir thu sawiin ngaihdam dilna a post zui bawk. Mi tam takin Martinelli hi dem zui bawk mah se a ngaihdam dilna hian boruak a vaw dai zui viau thung.
|henkhat ten dem viau bawk mah se thenkhat chuan Martinelli hi an dem hran lo thung. Inkhel tawp dawn hnaih lamah Arsenal hian na takin an khingpuite an nawr a, goal thun tuma an tan nat vanglai tak a ni nghe nghe. Hliam vanga let reng Conor Bradley hi mual chhung lamah a lum lut hrut a, hun khawhral tuma na der a ang viau reng bawk. Mah se, na der lova zawnchhuah a ngaih tak si vangin Martinelli hi a thang mawi lo zo ta a ni ber mai.
Inkhel ngahhlelhawm leh hmuhnawm tak chu goal awm lovin a tawp a, team lian pahnihten point khat ve ve an hmu. An mualah an chak zawh loh vangin Arsenal in Manchester City leh Aston Villa lakah poit 8 a san fal theihna hun tha an neih an chhawr tangkai zo lo. An mualah chak zo lo mah se Gunners hian point 6 in hma an la hruai fal tho thung. Nilai zanah an elpui liante an chak zo lo vek kha an hlawkpui zui zel a ni ber mai. Arsenal hian an mualah an chak lo a nih pawhin tlawm an tum lo hrim hrim a tih theih a. Goal thun tuma risk lak vak aiin an goal venhim an ngai pawimawh niin a lang. Hei vang hian Arsenal hi huaisen tawk lo nia ngaihna lian tak a awm.
Arsenal nen inhnehtawkin, khelh 10 chhung tlawm nei lova kaltluang Liverpool hian EPL-ah khelh 21 atangin point 35 an hmu a, palina an luah mek. Hmahruaitu Arsenal nen an inkarah point 14 zet a tlazep tawh a. An tan champion nawn a harsa hle tawh dawn. Champion thei lo tawp erawh an la ni bik lo thung.
Arsenal an chak zo lo
