Daily Newspaper

Arsenal an hnungtawlh

9

Lodon club lian Arsenal chuan hma an sawn thei lova, an hnungtawlh zawk zel rih. Gunners hian kum 25 hnua an chetchhiat ber tum an tawng.

EPL leh FA Cup-a hnuhma nei tha Arsenal hian pathianni zan khan team talbuai, him hram tuma tangkawh Watford chu Emirates stadium-ah an mikhual a, 3-2 in hnehna chang hram mahse pariatna aia sangah an inhlangkai thei chuang lo.

Arsenal hian an mualah bul an tan tha hle a, minute 5-na lekah Pierre-Emerick Aubameyang chuan hmahruaina goal a thun nghak zat. Hma takah goal an chhuah vangin Watford dinhmun a chhe leh zual a, tlakhniam an hnaih leh zual sauh. Aubameyang goal thun hnu hian minute 24-naah Kieran Tierney chuan an goal hnihna a thun zui leh bawk. Gunners hian nawr chhunzawm zel in, minute 33-naah Aubameyang chuan an goal thumna a thun zui leh ta nge nge a, si thum faiain hma an hruai. Chawlhlawk dawn hnaih minute 43-naah David Luiz penalty chawi chu Troy Deeney chuan chiang zetin a pet goal a, an si phurh a sut then.

Chawlhlawk hnu lamah Watford an khel tha zui zel a, Arsenal hi lehthal an tum hle, minute 66-naah Dany Welback chuan an goal hnihna a thun zui ve leh nawlh a, an phur thar leh zual viau bawk. Hun tawp rak thlengin an si phurh sut ngei tumin tan an khawh a, Arsenal pawh an nawr buai hle nghe nghe. Hun tha an neih an chhawr tangkai zo lova, Arsenal lakah uiawm taka tlawm in, EPL-ah an inhamtang zo lova, an tlahniam ta a ni.

Arsenal tana goal hnih thuntu Aubameyang khan EPL-ah goal 22 a thun tling a, Jamie Vardy goal thun zat nihrual a, a zawna EPL topscorer nih a tumna chu goal khatin a tluk zo ta lo va, uiawm takin Golden Boot a hlawhchhuak zo lo.

Hun rei tak chhung top 4 huang lo luah tawh thin Arsenal an tlahniam zel a, a zawna a vawithum nan Champions League an khel phak lo a ni mai tawh lova, Europa League pawh an khel phak tawh lo hial a, pariatna ni chungin season an khar. Kum 1994-95-ah khan 12 na an ni a, kum 25 hnu lama an chetchhiat leh ber tum, hun chhe tak an tawngbua a ni. Arsenal hian Europa League khelh phak theihna hun hnunung an la nei a, FA Cup-ah Chelsea an hneh hlauh a nih chuan Europa League-ah inlanphak theihna hun tha an nei thei dawn. Inrinni zan hian FA Cup final khelh a ni dawn a, Arsenal tan fiahna hautak tak a ni dawn a, FA Cup champion tam ber an nihna tizau turin Chelsea hneh an mamawh tak zet dawn a ni.

Premier League atangin Waford chu an tlahniam ta a, tun hi EPL atanga an tlakhniam vawithumna a ni. 1999-00 khan a vawikhat nan an tlahniam a, 2006-07-ah an tlahniam leh a, 2019-20-ah tlahniam leh in, Championship lamah hun an hman leh lauh lauh phawt a ngai dawn ta a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy