Daily Newspaper

Arsenal an insingsa

25

Thawhtan zan dar 11:00 khan player lei leh hralh theih run pui; Nipui Bazar khar a ni ta a, bazar tawp niah London club lian Arsenal an chetha thawkhat a, hun rei tak an hel tawh Thomos Partey an la lut. Arsenal midfielder pahnih an chhuak ve thung a, Lucas Torreira chuan Atletico Madrid a pan a, Mikel Arteta hnuaia duhsak hlawh zo ta lo Matteo Guendouzi chuan German Bundesliga club Hertha Berlin a pan ve bawk

Partey an lei fel
Arsenal manager Mikel Arteta chuan a duh anga khelchhuak thei turin player thar a mamawh belh a, defender leh winger a lak belh tawh. Defender thar Gabriel Mangalhaes phei chu an inngahna a ni der tawh a, a chhawr tangkai viau. Chelsea atangin winger tha tak Willian a la lut bawk a, Willian pawh a chhawr rim nghal hle bawk. Muallai player tha a nei lova, holding midfielder thar a mamawh hle. Midfielder tha an melh kual ruai ruai a, hun rei tak an hel tawh Ghana midfielder Thomas Partey chu Atletico Madrid atangin an la lut fel hman chiah chiah.

Atletico Madrid tana khel tha thei tak Partey hi La Liga club lian Atletico Madrid hian a lakchhuah theina zat atan 50m euros (£45.3m) an dah a, hemi zat hian Arsenal hian an lei ngam mai lo. Lyon midfielder Houssem Aouar lak tumin hma an han la zui leh renrawn a, Aouar hi an lak luh theih mai pawh an beisei hman hle. Mahse kum 22 mi hian Lyon-ah cham chhunzawm a thlang leh ta zawk. Aouar an lak theih tak loh vang hian bazar tawp niah Partey hi Atletico Madrid in an chhiarna ang zarin an dawr thut a. Bazar theih hun chhungin an la lut fel hman chiah chiah a, an mamawh player an la lut.

Arsenal midfielder thar Thomas Partey hian kum 2011 khan Odometah atangin Atletico Madrid youth team a zawm. Kum 2013 -2015 chhung khan Atletico Madrid B team tan a khel a, hemi hnu hian Marllorca leh Almeria te loan in a zawm leh te te. Kum 2015 atang khan senior team tan a khel tan a, inelna hrang hrangah vawi 188 a khel tling hman a, La Liga-ah bik vawi 132 khelin goal 12 a thun tling hman a ni. Season liam ta khan Diego Semione-a player pawimawh a ni a, La Liga-ah vawi 35 zet a khel tlingin pathumna a nihpui. Atletico Madrid hi Europa League leh UEFA Suoer Cup-ahte a champion pui tawh. Ghana tan kum 29 a khel tling tawh bawk. Ghana Player of the Year chawimawina vawihnih; kum 2018 leh 2019 te khan a dawng tawh nghe nghe a ni.

Torreira leh Guendouzi inpuchhuak
Arsenal in midfielder thar tha tak Thomas Partey an lak luh tak vang hian an midfielder pahnih; Lucas Torreira leh Matteo Guendouzi te an inpuchhuak ve thung a, loan hmangin tirhchhuah an ni.

Gunners chuan Unrguay midfielder Lucas Torreira hi kum 2018 khan Serie A club Sampdoria atangin £26m zet sengin an la lut a, an lak luh tirh lamah an chhawr tangkai thawhkhat hle. Gunners tan hian inelna hrang hrangah vawi 89 a khel tling a, EPL-ah bik chuan vawi 63 khelin goal thum a thun. Partey-a’n Emirates Stadium a pan a, Torreira hian loan in Atletico Madrid a pan ve thung.

Arsenal manager hlui Unai Emery hnuaia player pawimawh tak ni hman a, hming chher hman tak Matteo Guendouzi chuan a nungchang that loh a tuar a, manager thar; luhlul ve tak Mikel Arteta nen boruak tha lo tak an nei a, Arsenal tan khelhna hmun a chang thei ta mang lova, loan hmangin tirhchhuah a ni ta hial a, khelhna hmun nghet tiamtu Hertha Berlin lam a pan mai a ngai ta a ni.

Guendouzi hi Lorient atangin kum 2018 khan an la lut a, inelna hrang hrangah vawi 82 zet a khel tling hman. Unai Emery-ah hnuaiah player pawimawh tak a ni a, 2018-2019 season-ah khan EPL match 38-ah vawi 33 zet a khel. Arteta hnuaiah erawh hmun a chang thei ta lo thung a, season tharah phei chuan Arteta hian match day squad-ah a la telh lo hrim hrim hial a ni. Berlin lamah a inchher hriam te te ang a, tha zawkin Arsenal tan a kir leh thei ngei tura ngaih a ni a, player hriat hlawh a nih ngei a beiseiawm.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy