December 6, Inrinni zan khan English Premier League 2025-26 khelh chhunzawm a ni a, hmahruaitu Arsenal chu Aston Villa hneh lovin an tlawm. Arsenal an tlawm laiin Manchester City in hnehna an chang a, champion tuma inelna boruak a nung thar leh zual. City an chak lai hian team lian Liverpool leh Chelsea in hnehna an chang zo lo ve bawk.
Gunners veltu Villa
Hliamin a tihbuai nasat Arsenal hi tunhnaia khel tha Aston Villa hmachhwn turin Villa Park-ah an lenglut. An lenluhna mualah ring angin an khel tha lova, an tlarhnung a pherh leh zual. Gunners hian khel tha lo zawk chungin point an hmu teuh viau naa hun tawp dawna Emiliano Buendía goal thun hmangin an tlawm a, Aston Villa in Arsenal an vel.
Aston Villa lakah hian hliam vangin defender pathum; William Saliba, Gabriel leh Mosquera te an inlan thei lo. Midfield-ah an that theih dan ang berin inlan thei tawh mah se an tlarhnung player pawimawhte an chhawr thei lo an tuar a, ngai an awh phak lo. Side back Jurrien Timber chu a laiah a awm a ngai a, a awm ngai lohnaa awm a ni bawk a talbuai zauh zauh. Mikhual an nihna hmunah goal an chhuah hmasak vangin Mikel Arteta chuan hliam damkawr Leandro Trossard leh Viktor Gyokeres te a duh aia hmaah a luhtir a ngaih phah bawk.
Tunhnaia khel tha Aston Villa hian an mualah chak ngei tumin tan an khawh a, an mikhual Arsenal an ngam hle. Inkhel tir lamah goal thun theihna hun tha nei bawk mah se an chhawr tangkai zo lova a, Si nghak David Raya an paltlang mai thei lo bawk. Gunners pawhin hlauhawm siam bawk mah se goal an thun thei bik lo. Inkhel hmuhnawm takah goal lut a awm theih loh reng hnuin Villa an vannei ta nge nge. Villa hian fuh taka an nawr tlang hnuin Matty Cash chuan minute 36-naah si nghak David Raya kapkarah chiang zetin a thawlh lut a, hmahruaina goal a thun. An mualah goal thun hmasa zawka an tan vangin Villa an phur a, 1-0 a hmahruai chungin chawlhlawk an hmang.
Arsenal in goal thun an mamawhzia an hria a, chawlhlawk hnu lamah Leandro Trossard leh Gyokeres te an luhtir nghal. Second half tir lamah Arsenal game a kang a, an khingpuite an nawr viau. Arsenal tan hian Trossard chuan minute 52-naah goal a thun a, an si phurh a sut ta nge nge.
Goal khat ve ve an thun hnuin inkhel a hmuhnawm zui viau a, goal thun tumin an innawr tawn nasa hle. Goal an chhuah hnuin Villa an insiamtha nghal zat a, ball chang tam zawkah tang let lehin, game an thuhnun. Hlauhawm takin an mikhualte nawr thin mah se goal an thun thei bik lawk lo. Goal dang luh belh lovin hun pangngai a tawp a, hun pek belh pawh a tawp tep tawh bawk. An inhnehtawk mai tura ngaih a nih tawh laiin Arsenal tlarhnung an talbuai a, ball an petchhuak thei lo. Buai nuaih nuaih karah hian Emiliano Buendía chuan goal thun theihna hun tha a hmu a, minute 90’+5-ah fuh zetin a pet goal a, goal pawimaw zet a thun. Buendía goal thun hnu hian inkhel a tawp zui nghal a, Aston Villa in table chung bera awm Arsenal hnehin point thum hlu tak an hmu.
Arsenal laka point thum an hmuh hmangin Aston Villa hian khelh 15 atangin point 30 an hmu tling ta chiah a, pathumnaah an insawh nghet. Hmahruaitu Arsenal nen an inkarah hian point thum chauh a tlazep tawh a, kum tam tak hnuah champion tumin hma lam an pan zel.
City an chak awlsam
An chunga awm Arsenal an chak lo tih hre chungin Manchester City chu an mualah an inlan a, Etihad Stadium-ah Sunderland an mikhual. City hian an mualah 3-0 in hnehna an chang a, awlsam takin point thum an hmu. Sunderland an hneh vangin City hian Arsenal an hnaih leh zual a, an inkarah point hnih chiah a tlazep tawh.
City hian season kal mekah rin phak baka khel tha Sunderland lakah goal an thun thei mai bik lo. Goal lut a awm lawk loh hnuin Rúben Dias chuan minute 31-naah pui zetin a pet goal a, hmahruaina goal a thun. Goal an thun hnuin City an khel tha chhunzawm a, goal an thun belh leh thuai. Corner atanga ball kal chu defender Josko Gvardiol chuan minute 35-naah fuh zetin a tauh goal a, an goal hnihna a thun. Chawlhlawk hmaa goal hnih an thun bakah hian tunhnaia rawn khel tha thar leh Phil Foden chuan minute 65-naah Cherki siamsak tha zet a tauh goal a, an goal thumna thunin an chakna a nem nghet.
Liverpool leh Chelsea te an chak lo zo
Inrinni zana inkhel dangah team lian Liverpool leh Chelsea ten hnena an chang zo lo. Goal ruk zet luhna inkhelah Liverpool leh Leeds United te 3-3 in an inhnehtawk a. Chelsea leh Bournemouth te chu goal awm lovin an lo inhnehtawk ve bawk.
Leeds United nen an inhmachhawn tum hian Liverpool bench-ah Mohamed Salah a thu tluan a, a zawna a vawi thum nan Salahhi hian bul a tan phak lo. A pawimawhna a hloh tak vangin Salah hian hreawm a ti hle a, January thlaah a chhuah mai a rinawm.
Arsenal an tlawm, City an chak
