Arsenal chak laiin City an tlawm

Nilaini zan khan UEFA champions league 2024-25 khelh chhunzawm a ni a, inkhel hmuhnawm takah Arsenal in an mualah hnehna a chang a, last 16 an hnaih. Pathumnaah Arsenal an inhlankai laiin Manchester City erawh chu Juventus hneh lovin an tlawm a, tlak an hnaih ve thung.
Arsenal tan Saka a vul
English Premier League-ah pathumnaa awm mek Arsenal hian Emirates Stadium-ah French club lian AS Monaco an mikhual a, an mualah 3-0 ngwtin hnehna an chang. Gunners tan hian Bukayo Saka chuan goal hnih a thun a, a vul hle.
Last 16 hnaih leh zual tura chak mamawh Arsenal hian an mualah an khel tha viau a, an mikhual Monaco an nawr na thei hle. Goal thun theihna hun tha nei bawk mah se si nghak Radoslaw Majecki a chetha viau a, an paltlang thei mai lo. Darkar chanve chhung ngwt goal lut a awm theih loh hnuin Arsenal in goal an thun ta nge nge. Gabriel Jesus siam tha tak chu Bukayo Saka chuan minute 34-naah awlsam takin a pet goal a, hmahruaina goal a thun ta nge nge. Saka goal thun hnuin goal thun theihna hun tha nei bawk mah se chawlhlawk hmain goal lut a awm belh thei lo thung.
Chawlhlawk hnu lamah Arsenal an khel tha chhunzawm a, an mikhual an nawr na thei hle. Goal thun theihna hun tha nei thin bawk mah se Radoslaw Majecki a chetha viau a, an team hnufual lutuk tur a chhanhim. Goal a luh belh theih loh reng hnuin Saka bawk a inlar a, minute 78-naah an goal hnihna thunin, an hmahruaina a tizau.
Si hnih faia hma an hruai vangin Arsenal an phur a, inrintawkna sang zawk nen an inlan. Na taka an khingpuite an nawr rah an seng a, hun tawp dawn hnaih minute 88-naah Kai Havertz chuan an goal thumna a thun a, an chakna a nemnghet. Havertz goal thun hnuin goal dang a luh belh thei tawh lova, Gunners chuan an mualah awlsam takin hnehna an chang zui ta a ni.
An mualah an chak vangin Arsenal hian UCL vawi ruk an khelh tawh atangin point 13 an hmu a, pathumnaah an inhlangkai. Arsenal hian League stage-ah bik khelh hmasak pahnih an la nei. January ni 22-ah Dinamo Zagreb an hmachhawn ang a, a kar lehah Girona an hmachhawn zui leh ang. Arsenal in Last 16 an hnaih viau tawh laiin Monaco erawh chuan 16-na an luah ve thung.
City an tlawm leh tawh
Inelna hrang hrangah Manchester City an khel chhe tluang viau a, Champions League-ah an tlawm leh tak vangin last 16 lut phak lo thei dinhmun derthawngah an ding mek. City hian Allianz Stadium-a an khingpui Juventus chu si hnih faiin an hneh lo.
Italian club lian Juventus hian an mualah an khel tha viau a, team lian Manchester City laka goal hnih an thun bakah an nawr let hlauhawm tak an dang tluan thei bawk. He inkhel hmuhnawm takah hian chawlhlawk hmain goal lut a awm thei lo phawt a, chawlhlawk hnu lamah erawh goal a lut ta thuai thung. Serie A club lian tan hian Arsenal in lak tuma an hel mek Dusan Vlahovic chuan minute 53-naah hmahruaina goal a thun. Vlahovic goal hian mualneitu team a fuih phur viau a, an mualah thatho zawkin an inlan chhunzawm theih phah.
Si khat faia hma an hruai hnuin Juventus in hun tha an nei zui leh nghal a, Weston McKennie chuan minute 75-naah goal an goal hnihna a thun belh leh ta mai a, he goal hian dinhmun chhe zawkah Manchester City a tluk luh tir. City hian hlauhawm takin an khingpuite nawr let thin mah se hun tawp thlengin goal an thun thei lo tluan a, Juventus hneh lovin an tlawm zui ta a ni.
Juventus lakah an tlawm leh tak vangin EPL champion Manchester City hian khelh ruk atangin point 8 chauh an la hmu a, 22-naah an awm mek. An khelh chhiat tluan em vangin an dinhmun a chiang lo hle a, last 16 lut phak lo thei dinhmunah an ding mek. City hnehtu Juventus pawh hi khelh tha tak an ni bik lova, khelh ruk atanga point 11 hmuin 14-na an luah ve mek bawk.
UCL khelh dan thlak danglam niin table-ah pakhatna atanga pariatna thlengin direct in last 16 an lut a. Team 16 dangin last 16 play-off an khel zui leh dawn. Leage round-ah bik match hnih chiah khelh hmabak a awm tawh a, EPL club; Liverpool, Arsenal leh Aston Villa ten top 5 huang an luah mek a. Chetha tura ngaih City erawh an che chhe ta viau thung.
Atletico Madrid an chak
Nilai zana inkhel dangah La Liga club lian Atletico Madrid chuan an mualah hnehna an chang a, an mikhual Slovan Bratislava chu 3-1 in an hneh.
Atletico Madrid tan hian City forward hlui Julián Álvarez chuan minute 16-naah hmahruaina goal a thun a, Antoine Griezmann chuan goal hnih a thun zui leh bawk. Mikhual team tan ian David Strelec chuan penalty atangin an si phurh sut then mah se tlawm an pumpelh thei ta chuang lo a ni.