Thawhtan zana English Premier League inkhel awmchhunah Arsenal chuan captain Martin Odegaard goal thun hmangin Crystal Palace an hneh. EPL season tharah vawi hnih chak zawn thei team pathum zingah Gunners an tel thar. Palace an hneh tum hian Gunners defender Takehiro Tomiyasu hnawhchhuah a ni a. An defender hnawhchhuah a nih danah manager Mikel Arteta a lungni lo hle.
Selhurst Park-a lenglut Arsenal an khel tha viau a, London derby-ah inkhel mawi leh hmuhnawm an lantir. An forward Eddie Nketiah a talna viau a, Eagles tlarhnung thlabarin a siam fo. West Ham United atanga an lak Declan Rice pawh a khel tha viau a. Gunners player manto ber Rice hi game khaidingtu pawimawh a tling a, a hmuhnawm viau bawk.
Mimuakah khel tha in, hmuhnawm viau bawk mah se Arsenal in goal an thun mai thei bik lo. Chawlhlawk hmaa goal thun thei an awm loh laiin chawlhlawk hnu lamah erawh goal a lut ta thuai thung. Minute 53-na lekah khel tha tak Nketiah chuan box chhungah ball a khalh lut a, goal thun theihna hun tha a neih laiin Palace si nghak Johnstone-a’n a titlu a, penalty a chawi. He penalty hi captain Martin Odegaard chuan a pet goal a, hmahruaina goal a thun.
Odegaard goal thun hnuin Arsenal an khel tha chhunzawm a, kim lo zawkah an tang thuai thung. Arsenal hian throw ball an hmuh chu vawm mai lovin hun an paw khawtlai det. Hei vang hian an defender Takehiro Tomiyasu chuan yellow card a hmu. Hun pawh khawtlai vanga card a hmuh hnu lawkah Tomiyasu hian Jordan Ayew a pawh vangin yellow card a hmu nawn leh a, hnawhchhuah a ni.
An mualah tam zawk an nih hnuin Crystal Palace an pawr thar a, an si phurh sut ngei tumin tan an khawh. Goal thun tum ngawrh viau mah se Arsenal in an goal an venghim tluan a, Palace in an mualah point an hlawhchhuak zo lo.
Crystal Palace mualah hnehna an chan leh tak vangin Arsenal hian khelh hnih atangin point ruk an hmu a, pathumnaah an inhlangkai. EPL season tharah khelh hnih chak zawn thei team thum chiah an awm a. Chungte chu Brighton, Manchester City leh Arsenal te an ni a. Table chung bera awm mek Brighton hi EPL chanchinah hmahruaitu an nih vawi khatna a ni a. Engtia rei nge hma an hruai theih dawn tih erawh a hriat loh thung. Pathumnaah Arsenal an chhoh laiin Crystal Palace erawh chu 11-naah an awm ve thung.
Crystal Palace hneh a, point thum an hmuh vangin Arsenal manager Mikel Arteta a lawm a. An defender Tomiyasu hnawhchhuah a nih danah Arteta hi a lungni lo viau thung. Gunners in throw ball an hmuh hi Thomas Partey-a’n vawm a tum zet hnuah Kai Havertz-a’n Tomiyasu ball a pe leh. Tomiyasu hian ball vawm nghal mai mah se a thiante tih dik loh a tuar a, yellow card hmanga hrem a ni.
EPL season tharah hian tul lova hun khawhral a tam loh nan hun an khawh ral ang zat hun pangngai tawp hnuah pek belh leh thin tur tih a ni thar. Hei vang hian inkhel entute hun khawhral kawngah an fir leh zual. Hun pangngai tawp hnua hun pek belh leh tho tur a nih laiin card hmanga inhrem tho si hi hrethiam lo an tam a, sawisel a hlawh hle.
EPL season tharah referee ten card phawrh mai an sam ta a, round hnihna an khelh chhuah hma hauhin mi 32 laiin card an hmu der tawh. Hetiang zel a nih chuan season tawp hunah meuh chuan mi 608 vel zetin Yellow Card an hmu hial tura ngaih a ni. 2022-23 season pumpuiah khan yellow card hi mi 174 in an hmu a. Hei hi season kal mek hian a khum viau dawn niin a lang.
Arsenal chakpuitu Odegaard
