Arsenal chhanhimtu Own-goal pahnih

December 12, Inrinni zan khan English Premier League 2025-26 khelh chhunzawm a ni a. Table-a hmahruaitu Arsenal chu table mawngphaha awm nghet tak Wolves lakah an mualpho teuh hle. Gunners hian hun tawp dawn hnaiah own-goal pahnih hmangin hnehna an chang thei hram a, Arsenal mualpho tur chhanhimtu chu own-goal pahnih a ni. Harsa taka Arsenal an chak lai hian team lian Liverpool leh Chelsea ten si hnih faiin hnehna an chang ve ve thung.
An mualah Gunners an mualpho teuh
Table-a hmahruai mektu Arsenal hian an mualah table mawngphah a awm nghet, khelh 15 atanga point hnih chauh la hmu Wolverhamptons Wanderers an mikhual. An mikhual lakah hian awlsam taka chak thei tura ngaih an ni a, an mualah hnehna lian an chan ngei a rinawm hle. Chak tura rinkai zawk ni chiang viau mah se an mualah ngei an mualpho teuh hle a, Own-goal vangin hnehna an chang thei hram chauh. ‘Khua a vawt a, Arsenal an reh tan thin’ an tih ang zawng zawng kha a takin a thleng leh teuh ther ther hle. An mualah chak zo lo ngat se chuan City in an nihrual thei hial dawn tihna a ni.
Arsenal hian an mikhual lakah hnehna chan ngei tumin tan khawh nasa viau mah se an hlawhtling har hle. Hun rei tak chhung goal lut a awm theih hnuin hun tawp dawn hnaih lamah an vannei ta hlauh. Bukayo Saka corner pet chu Wolves player Sam Johnstone chuan an lamah a ti-goal palh hlauh a, mualneitu Arsenal hmahruaina goal a thunsak.
Goal an thun vangin phur viau mah se Arsenal an phur rei lo. Wolves in fuh takin an nawr tlang a, Tolu Arokodare chuan minute 90-naah goal thunin an si phurh a sut. An si phurh an sut vangin Wolves an phur viau a, inrintawkna sang zawk nen Arsenal mualah ngei an inlan chhunzawm. Table chung ber luahtu Arsenal lakah point hmuh ngei tumin tan an khawh a, an hlawhtling teuh viau nghe nghe. Arsenal lakah tlawm pumpelh tum viau mah se a vannei reng seng lova, hun tawp dawn hnaihah an vanduai nawn leh. Wolves defender Yerson Mosquera chuan minute 90+4-ah an lamah a tauh goal a, Arsenal hmahruai nawn lehna goal a thunsak. Mosquera goal thun hnu hian goal dang a luh belh tawh lova, own-goal pahnih chhawr tangkkaiin Arsenal in mualpho an pumpelh a, harsa taka hnehna changin point thum an hmu.
Wolves lakah harsa taka hnehna chang hram Arsenal hian khelh 16 atangin point 36 an hmu a, table chung ber an luah nghet zui zel. Table chung berah Arsenal an awm chhunzawm laiin Wolves pawhin khelh 16 atanga point hnih chauh hmuin table hnuai ber an luah chhunzawm ve bawk. Wolves hi thlasik bazar inhawn hunah an squad an thuamchak viau a, season chaw hnu lamah an chetha viau a nih loh chuan EPL-ah cham chhunzawm a harsa hle dawn niin a lang a, Championship lama tlakhniam an hnaih hle a ni.
Wolves an hmachhawn tum hian defender pawimawh William Saliba a kir a, inkhel a hmachhawn ve thei tawh. Saliba kir vangin lawm viau mah se Ben White a inhliam thar ve leh thung a, hliam van gin Gunners an buai zui zel. Ben White hi hliam vangin lakchhuah a ni a, first half em pawh khel tluan thei lovin khelmual a chhuahsan.
Liverpool an chak
Tunhnaia khel tha hleithei lo Liverpool chuan hnehna an chang ve leh ta a, an mualphina thin Anfield-ah ngei Reds hian 2-0 in an mikhual Brighton & Hove Albion an hneh. Brighton an mikhual tum hian Mohamed Salah pawhin mual chhung a lut a, goal thun theihna hun tha hlah bawk mah se assist vawi khat neiin EPL-ah club khat tan assist ngah ber record thar duhawm tak a siam hial nghe nghe.
Liverpool hian Anfield-a an mikhual Brighton lakah bul an tan tha hle a. Hugo Ekitike chuan inkhel tan atanga minute khatna lekah hmahruaina goal a thun nghal. Hma taka goal an thun vangin an hloh then teuh tawh inrintawkna an nei let leh a, an mualah phur leh nuam ti zawkin an inlan zui theih phah.
An hmahruaina tihzau tumin tan khawh nasa hle mah se Liverpool an hlawhtling mai thei lo. Goal a luh belh thei loh reng hnuin Mualneitu Liverpool chu che fuh zawkah an tang hmasa leh. Goal hmahruai thintu Hugo Ekitike chuan minute 60-naah Moahmed Salah siamsak atangin an goal hnihna a thun a, an hmahruaina a tizau. Ekitike goal hnihna a luh hnuin goal dang a luh belh thei tawh lova, Arsenal in an mikhual Brighton chu 2-0 a hnehin point thum an hmu ve leh ta nge nge.
Liverpool goal hnihna hi Mohamed Salah siamsak atanga Ekitike thun a ni. Salah hian EPL-ah assist vawi 277 a nei tling ta chiah a. EPL-ah club khat tan assist nei nghah ber niin Manchester United tan assist vawi 276 nei tawh Wayne Rooney record a khum ta chiah a ni. Manager Arne Slot nen boruak tha lo an neih vanga Liverpool tan bul tan phak ta lo Salah hian bench ah thunin bul a tan a. Minute 26-naah Joe Gomez a inhliam vangin khelhna hun pek a ni a, assist neiin, record thar a siam ta hial a, he record hi atan a hlu hle ngei dawn.
Liverpool hian khelh 16 atanga point 26 hmuin table-ah hma an sawn hret a, paruknaah an awm lai lawk rih. Pathianni zana inkhel result a zirtin an dinhmun hi danglam hluai thei a la ni thung. Hetihlai hian Brighton hi pakuanaah an tlahniam ve thung.
Chelsea pawh an chak
Inrinni zana inkhelah dangah London club lian Chelsea chuan Stamford Bridge-a an mikhual Everton lakah hnehna an chang a, point thum hmuin top 4 huangah an kir leh.
Chet tha tluang hleithei bik lo Chelsea hian an mikhualte an ngam viau a, chawlhlawk hmaa goal hnih an thun an chakpui. Blues tan hian hliam vanga chawl reng Cole Palmer chuan minute 21-naah hmahruaina goal a thun. Chelsea leh England midfielder pawimawh Palmer hi hliam vangin a chawl reng a, Everton laka goal a thun hi September thla hnu lamah goal a thun leh hmasak ber a ni nghe nghe.
Cole Palmer goal thun hnu hian chawlhlawk dawn hnaih minute 45-naah Malo Gusto chuan an Chelsea goal hnihna a thun zui leh a, chawlhlawk hmaa goal hnih an thun hi an mikhual Everton lakah an chakpui a, an mualah point thum an hmu. Everton laka point thum an hmuh leh tak vangin Chelsea hian khelh 16 atangin point 28 an hmu tling chiah a, table-ah hmasawn leh hretin palinaah an inhlangkai. Everton hian khelh 16 atanga point 24 hmuin pasarihna an luah ve mek thung.