North London club Arsenal chuan attacking player tangkai leh ren tin daih an tih ang chi Christos Tzolis chu Club Brugge atangin pound maktaduai 34-in an senglut fel.
Kum 24-a upa Greece international-in Premier League champion a zawm hnuah a khawi lam lam mahin inrawih rei zawng tur an tarlang lo a, an sawi chhun chu ‘long-term contract’ tih a ni mai.
Tzolis hian Club Brugge tan match 108 khelhah goal 43 thunin assist tum 45 a siam chhuak tling.
Belgium club atanga Arsenal a zawm hma tunthla ti rlam khan Belgium forward Leandro Trossard chu English club atangin Besiktas-ah a insawnchhuak a, Gunners-in an tlarhma tichak turin Tzolis lam an hawi zui ta a ni.
Arsenal sporting director Andrea Berta chuan Christos chu veilam sira tan khawh chi ni mah se nuamsa taka frontline luah thei a nih tel thu sawi chungin, “A ke khawi lam lam pawh hmang thiam, excellent finisher kan tih ang kha a ni a, hmun chep elkhenah pawh a insiamrem thei a, a ball chan ngheh dante chu pui tak niin, season liamta pathumah khan goal leh assist-ah a chungnung a, kan squad technical level tisang thei tur mi niin, kan team tan rilru lamah pawh chakna leh thathona pe theitu tur mihring a ni,” tiin a fak.
PAOK lama a career bul tan Tzolis hian tun hma lamin English club dang Norwich City thuam a lo inbel tawh a, he club tan hian kum 2021 leh 2024 chhung khan hun hlimawm tak a hmang pha lo a, match 30 khelin goal thum a thunsak thei hram a ni.
Greek forward hi season liamta khan Belgian top flight-ah a vul thung a, league goal 40-ah inrawlhin, a ma puala a thun tak chu goal 17 niin, assist tum 23 ngawt a siam tling thung a, Club Brugge chu league champion a nihpui chiang hle.
Arsenal forward thar Tzolis
