Arsenal in champion an hnaih

Inrinni zan khan English Premier League 2025-26 khelh chhunzawm a ni a, table-a hmahruaitu Arsenal chuan Everton lakah hnehna an chang. Arsenal an chak laiin pahnihnaa awm mek Manchester City chuan West Ham United lakah hnehna an chang zo lo. City an chak zawh loh vangin Arsenal in point 9 ngawtin hma an hruai fal a, champion an hnaih leh zual sauh.
Rawlthar duhawm
MaxDowman
Table chung ber luah mektu Arsenal hian an mual; Emirates Stadium-ah Everton an mikhual. Chak mamawh tak chungin Gunners hian goal an thun thei lo hle thung. An mualah ngei an chak zo lo mai dawna a lan hnuin rawlthar duhawm Max Dowman a inlar a, assist vawi khat a neih leh goal a thun hmangin Arsenal in hnehna chhiahchiahthlak an chang. Arsenal chakpuitu Dowman hian EPL record thar a siam hial nghe nghe.
Emirates Stadium-a an mikhual Everton lakah chak tumin Arsenal in tan an khawh nasa hle. Hlauhawm siam bawk thin mah se goal an thun thei lo reng a, goal thun an tum luatah goal an chhuah teuh viau thin bawk. Si nghak David Raya chetthat zar leh Everton an vanduai tel bawk vangin Gunners hi an him hram hram zel. Inkhel hmuhnawm takah goal a lut thei lo reng a, an chak zo lo mai dawna a lan vangin Arsenal tantute an ngui hman viau tawh. Hun tawp dawn hnaih lamah Mikel Arteta chuan Kai Havertz leh Martin Zubimendi la chhuakin Viktor Gyokeres leh rawlthar Max Dowman te a luhtir a, a tifuh hle. Hun tawp dawna a luhtir Gyokeres leh Dowman te hian goal an thun ve ve.
A kum phu lova hmuhnawm leh inringtawk taka inlan Max Dowman chuan ding lam sir atangin ball tha zet mai a vawrh lut. Dowman ball vawrh luh tha tak hi Arsenal defender Piero Hincapie chuan Viktor Gyokeres tan fuh takin a chhawpsak. Awmna hmun tur dika awm Gyokeres hian minute 89-naah awlsam zetin a pet goal a, hmahruaina goal a thun.
Table chung ber luahtu Arsenal hi Everton in an tiatpui en tlat a, an lak tlawm mai an tum bik hauh lo. Goal thun ngei tumin tan an khawh a, hun pek belh tawp dawna corner an hmuh atanga goal thun ngei tumin si nghak Jordan Pickford pawh a tlanchhuak hial. Pickford tlanchhuak hi Max Dowman tan record thar siam tura hun tha petu a ni ta thung. Gunners hian fuh zetin an khingpuite an nawr tlang a, kum 16 leh ni 73-a upa Max Dowman chuan inringtawk zetin a khalh tlang a, awlsam takin goal ruakah pe pet goal a, minute 90+7-ah an goal hnihna a thun. Arsenal goal hnihna thuntu Max Dowman hian EPL-a goal thun thei naupang ber record thar a siam a. Khawvela league ropui berah hnuhma ropui a hnutchhiah.
Dowman goal thun hnu hian hun a tawp zui a, Arsenal chuan an mualah hnehna pawimawh tak changin City nen an inkar an tizau leh zual. Khelh hmabak pasarih chauh nei tawh chunga point 9 ngawta hma an hruai fal vangin Arsenal in champion theihna hun tha tak an nei a. An champion leh champion loh chu an kuta innghat, an kut zala tla liau liau a ni tawh.
Tunge Max Dowman
Khawvela tualchhung League ropui ber English Premier League-a goal thun thei naupang ber record thar siamtu Max Dowman hian ngaihven a hlawh thar hle. Talent a neih thatzia hre chiangtute erawh chuan record thar a siam a, a langsar ta hluai hi mak an ti lo viau thung.
December 31, 2009 a piang Max Dowman hian kum 8-a upa a nih lai atangin Arsenal Academy a zawm tan a, kum 13 mi a nih laiin Arsenal under 18 team tan a khel tan tawh. 2025-26 season tan dawn pre-season tour-ah Arsenal senior team tan a khel tan a, football ngainatute mit a la thei hle. March ni 7, 2026-ah FA Cup-a Mansfield Town an hmachhawn tumin a vawi khat nan Arsenal tan bul a tan a, Arsenal tan FA Cup khel thei naupang ber a ni nghal. Hei bakah hian Champions League-ah Arsenal tan khel thei naupang ber a ni zui leh bawk. Arsenal tan record pahnih a siam hnuin inrinni zan khan Everton lakah goal a thun a,
James Vaughan reocord khumin EPL-a goal thun thei naupang ber a ni a, record lian zawk a siam zui leh bawk. Everton laka Arsenal a chakpui vangin football khawvelin a hrechiang leh zual a, nakin lawkah khawvela player langsar ber ber zinga tel thei tura ngaih a ni.
City an chak zo lo
Arsenal in an mikhual Everton an hneh hnu hian Manchester City an inlan zui ve leh a, London Stadium-ah lenglutin table hnuai lama awm West Ham United an hmachhawn. Inkhel thunun hneh tak leh goal thun theihna hun tha nei tam zawk fe chungin City hian hnehna an chang zo lova, champion an beiseina a chuai deuh salh.
Arsenal nen an inkar tizim nawn leh tura chak mamawh Manchester City hian mikhual an nihna hmunah an khel tha a, ball chang tam zawk niin game an thunun deuh chawt. An tuma anga hmaah goal thun bik lo mah se minute 3-1-naah Bernardo Silva chuan fuh ang reng tak, vanneihthlak ang reng tak siin a pet goal a, hmahruaina goal a thun.
Goal thun hmasa zawk an nih vangin City an phur a, chak theih beiseina pawh an nei sang zui viau. An goal thun vangin phur viau mah se an phur rei lo hle thung. Goal an thun atanga minute li hnu lekah goal an chhuah ve nghal a, West Ham tan Konstantinos Mavropanos chuan fuh zeta tauh goal in an si phurh a sut.
1-1 a an inhnehtawk hnuin City an khel tha zui viau a, goal thun tumin an khingpuite an nawr na hle. An khingpuite nawr tlangin goal thun theihna hun tha nei fo mah se an vanneih ni a ni ngang lova, mak tak maiin goal an thun belh thei lo tluan. Hammers lakah hian mak tak maiin an chak lova, point hnih hlu tak an hloh zui ta a ni.
West Ham lakah City an chak zo lova, PepGuardiola team ten khingpui hautak tak tak an la neih dawn vawk vangin Arsenal tan champion theihna hun tha leh zual a awma ngaih a ni.