Daily Newspaper

Arsenal in champion thar hneh

10

Nilai zana English Premier League khelha team chetha lo Arsenal an insiamtha a, an mikhual Liverpool an hneh nawlh. Gunners lakah an tlawm vangin Liverpool in EPL-a point hmu tam ber nih an tumna a thlawn a, Gunners in hun rei tak hnuah big four team an hneh nawlh a, hun chhinchhiahtlak an tawng ve thung.
t
Emirates Stadium-a inkhelah hian champion thar Liverpool hian bul an tan tha a, goal pawh an thun hmasa zawk. Minute 20-naah Andrew Robertson cross atangin Sadio Mane chuan hmahruaina goal a thun. Hma taka goal an thun vang hian Reds hian Arsenal hneh tura ngaih a ni a, Arsenal lakah rinhlelhna lian tak a awm hman. Nidang ang lo takin a chetha teh mial a, chawlhlawk hmain hma an hruai let hman ta thung.

Mane goal thun atanga minute 12-naah Alexandre Lacazette chuan goal thunin an si phurh a sut. 1-1 a an inhnehtawk hnuin inkhel a hmuhnawm leh zual a, Gunners an khel tha chho ta hle. Minute 44-naah Alisson-a’n a thenfai that theih loh chu Reiss Nelson tan vanneihna a ni a, chiai lo takin hma an hruai letna goal a thun a, 2-1 a hma hruai chungin chawlhlawk an hmang.

Chawlhlawk hnu lamah Liverpool hian an si phur sut tum takin an khingpuite an nawr a, goal pawh an thun teuh thei hle. Arsenal si nghal Emiliano Martinez a chetha tak zet a, pui tak takin vawiriat ngawt save a nei, Mohamed Salah pet a dang phei chu pui tak a ni. Jurgen Klopp-a team lakah a chet that em vang hian ‘man of the match’ atan thlan a ni zui hial nghe nghe a ni. Derthawng takin hma an hruai a, an si nghak Martinez chethat zarzovin an him hram a, champion thar lakah hnehna hlutak an chang.

Champion thar lakah hnehna an chang nawlh hian Mikel Arteta team te a fuih phur hle ngei dawn a. FA Cup semi final-ah champion lai Manchester City lakah pawh tha leh inringtawk zawkin an inlan thei tura ngaih a ni. Inrinni zan hian FA Cup final luh tumin City an hmachhawn ang a, thawhleh zan khian EPL-a talbuai mek Aston Villa an hmachhawn zui leh ang.

Liverpool hian inkhel hautak tak an hmachhawn zui leh a ngai dawn a, karleh nilai zan khian Chelsea an hmachhawn zui leh ang. Chelsea hian Pathianni zan hian FA Cup an khel dawn thung a, Wembley khelmualah final luh tumin Manchester United an hmachhawn ang. Chelsea in FA Cup an khelh hah lai hian Reds hi tha takin an lo inbuatsaih thei dawn a, hei hi an hlawkpui thei hle tura ngaih a ni.

Liverpool tan record
Arsenal lakah chak zo lovin record thar siam an tum pakhat puitlin zo lo mahse Liverpool hian EPL-ah record siam theih dang an la nei tho thung.

EPL champion leh pahnihna inkara point tlazep hnem ber chu point 19 a ni a, kum 2017-18 season-ah khan Manchester City chu point 19 a sang fal chungin an champion. Vawi 36 khel tawh Liverpool hian point 18 in hma an hruai fal mek a. An chetha a, City in point an lo hloh zeuh a nih chuan City record hi Liverpool hian an khum thei dawn. Season khat chhunga EPL-a chak hnem ber chu City an ni a, 2017-18 khan vawi 32 an chak. Season kal mekah vawi 30 chak tawh Reds hian City record an la nihrual thei. City hian season khat chhunga mahni muala chak hnem ber, mahni muala point hlawhchhuak hnem ber record an siam mek bawk a, Liverpool hian heng record pahnihte hi nih rual theihna hun tha an la nei ve ve bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy