Site icon The Aizawl Post

Arsenal in Everton an sawp

English Premier League hmahruaitu Arsenal chuan nilai zan khan Emirates Stadium-a an mikhual Everton chu si li fai ngawtin an sawp a, point ngain hma an hruai fal. Inkhel dangah tunhnaia chak harsat Liverpool chuan si hnih faiin Wolves an hneh ve bawk.
Laipui a puak tha
EPL a hmahruai mektu Arsenal hian Manchester City lakah point ngaa hmahruai fal turin an mualah chak an mamawh a. 18-naah awm a, tlahniam thei dinhmunah ding mek Everton lakah chetsual nawn an tum tawh lo. Gunners hian Emirates Stadium-a an mikhual Everton lakah an khel tha viau a, chawlhlawk hma leh chawlhlawk hnu lamah goal hnih ve ve an thun a, an mualah ngei Laipui a puak tha hle.
Chak mamawh Arsenal hian an mualah ball an chang tam a, an mikhualte an kat kual nasa viau mahse goal thun turin darkar chanve chuang zet an nghah a ngai tho thung. Goal thun ngei tuma an khingpuite nawr ngar ngar Gunners hian minute 40-naah goal an thun ta nge nge. Defender Oleksandr Zinchenko ball pek fing tak dawngtu Bakuyo Saka chuan near post-ah rang zetin a pet goal a, hmahruaina goal a thun. Gunners hmahruaina goal thuntu Saka hian EPL-ah goal 50 a thun tling chiah a. EPL-a goal thun tling thei zinga naupang zual parukna a ni.
Saka goal thun hnu lawk hian tha zetin an khingpuite an nawr tlang zui leh nghal zat a, minute 45+1-ah Saka ball pek khalh tlangin Gabriel Martinelli chuan awlsam takin a pet goal a, laipui a puak nawn leh. Gunners hian si hnih faia hmahruaiin chawlhlawk an hmang a, point thum hlawhchhuak ngei tura ngaih a ni.
Chawlhlawk hnu lamah mualneitu Arsenal an khel tha chhunzawm a, an mikhualte an nawr bet zui viau. Mawi leh tha taka ball an inpek kual hnuin captain Martin Ødegaard chuan Leandro Trossard siamsak chu minute 71-naah awlsam takin a pet goal a, an goal thumna a thun. Captain cool ruih mai Ødegaard goal thun hnu hian chak tur zawk a chiang tawk viau tawh a ngaih a ni zui nghal.
An mualah si thum faia hmahruaiin, chak tur zawk chiang tawk viau tawh mah se Arsenal in goal thun belh tumin an mikhualte an nawr zui zel a, laipui a puak nawn leh. Minute 80-naah Martinelli chuan Nketiah siamsak chu Everton si nghak Jordan Pickford kap karah awlsam zetin a pet goal a, an goal lina thunin an chakna a nem nghet. Leandro Trossard an lak luh hnuin Gunners manager Mikel Arteta chuan Brazil forward Martinelli hi main striker angin a chhawr a, a tisual lo hle. Brazil rawlthar hian Arsenal tan a khelh hnuhnung vawi hnihah goal thum a thun ta hial a ni.
An mualah awlsam taka point thum an hmuh chhawr tangkaiin Arsenal chuan Manchester City nen an inkar an tizau hret a. An hnuai chiaha awm City nen hian an inkarah point 5 a tla zep ta chiah. Arsenal hi champion thei tura hma lam an pan leh det laiin Everton erawh chu tlahniam thei dinhmunah an ding zui zel a. Manager thar Seasn Dyche hnuaia siam tharna chan beisei Toffees hian khelh 24 atanga point 22 hmuin, 18-naah an awm mek.
Liverpool an chak
Nilai zana inkhel dangah Liverpool chuan Anfield-a an mikhual Wolves chu si hnih faiin an hneh a, point thum an hlawhchhuak ve ta nawlh.
Sason kal meka beisei phak lo, tual-chhung leh Europe khawmual inelnaah pawh chak harsat Liverpool hian an mikhual Wolves lakah an khel tha thawkhat viau naa goal erawh an thun har viau thung. Sadio Mane awm loh hnua goal thun harsat ta deuh tlat Reds hian minute 70 thlenga goal an thun theih loh vangin an mualah an chak zawh loh mai a hlauhthawnawm hman a. An chungah rinhlelhna lian tak a awm laiin minute li chhung lekin goal hnih an thun hman leh daih thung.
Reds hian penalty an beisei thlawn hnu lawkah free kick a hmu a, free kick atanga ball kal hi defender Virgil van Dijk chuan a tauh a, harsa taka Wolves si nghak Jota siamsak tha tak chu Van Dijk vek hian awlsam zetin a tauh goal a, hmahruaina goal a thun ta nge nge. Harsa taka goal an thawhchhuah vangin Jurgen Klopp-a team te an thaw huai a, goal dang an thun belh leh thuai bawk. Van Dijk goal thun atanga minute lina lekah fuh zetin an khingpuite an nawr tlang zui leh nghal a. Vei lam sir atanga Tsimikas siam tha tak chu Mohamed Salah chuan awlsam takin a pet goal a, an goal hnihna a thun a, an hmahruaina a tizau.
Salah goal thun hnu hian hun tawp thlengin goal dang a luh belh thei tawh lova, Reds chuan an mikhual Wolves lakah si hnih faia hnehna changin an mualah ngei point thum an hlawhchhuak. Liverpool hian khelh 24 atanga point 39 hmuin hma lam an pan hret a, paruknaah an inhlangkai. Wolves lakah hnehna an chan vangin top 4 huang luah phak beiseina sang zawk an nei thar a, Champions League khelh phak ngei tumin tan an khawh zui an

Exit mobile version