December 2, Inrinni khan English Premier League 2023-24 khelh chhunzawm a ni a. Arsenal chuan an mikhual Wolves hnehin table-ah hma an hruai chhunzawm. Arsenal in hma an hruai chhunzawm laiin Manchester United erawh chu Newcastle United lakah an tlawm a, hma an sawn tak tak thei lo thung.
Arsenal game a nghet
Season kal meka khel tha tluang Arsenal chu Mikel Arteta hnuaiah an game a nghet a, an puitling sawi viau bawk. Season liam taah uiawm takin champion zo lo mah se Gunners hian champion zia an pu a, game nghet tha tak neiin Emirates Stadium-a an mikhual Wolves chu si hnih faiin an hneh a. Hma hruai chhunzawm turin point thum an hmu.
Arsenal hian an mikhual Wolves lakah bul an tan tha viau a, inkhel tan atanga minute thum chhung lekin goal hnih an thun hman der. Inkhel tan atanga minute rukna lekah Bukayo Saka chuan defender Tomiyasu siamsak atangin hmahruaina goal a thun. Hma taka goal an thun vangin Arsenal an phur viau a, inrintawkna sang zawk nen an mualah an inlan chhunzawm theih phah.
Saka goal thun hnuin an khingpuite an nawr chhunzawm a, minute 13-na leka captain Martin Ødegaard chuan Olekzandr Zinchenko siamsak atangin an goal hnihna a thun a, an hmahruaina a tizau. Inhnaih chilh taka goal hnih an thun vangin Gunners hian goal tam zawk nen hnehna an chan ngei a rinawm laiin goal dang an thun belh thei tawh lo thung. Mualneitu lamin an hun tha neih an hlah zel laiin hun tawp dawn hnaih minute 86-ah Matheus Cunha chuan Wolves tan goal thunin an si phurh a sut then. Gunha goal thun hnu hian hmahruaitu lakah point hmuh theih ngei beisei viau mah se Wolves pawhin goal dang an thun belh thei tawh bik lova, 2-1 in an tlawm zui ta a ni.
An mualah an chak leh tak vangin Arsenal hian point liin hma an hruai fal mek a. Pathianni zanah Manchester City result a zirin hma an hruaina point zat hi a danglam leh thung ang. Arsenal hi champions league lamah pawh an khel tha viau a, kar laihawl khan an khingpui Lens chu si ruk fai ngawtin an sawp a, Group champion niin last 16 an lut chiang zui nghal bawk.
United an tlawm leh tawh
Sawisel vak dawna hnehna chang leh khauh thin, fak dawna tlawm leh khut thin si Manchester United an insiamtha thei tak tak lo. Red Devils hi inrinni zana an khingpui Newcastle United lakah si khat faiin an tlawm a, pasarihnaah an tlahniam zui leh nghal.
St James Park-a lenglut United hian point hmuh ngei tumin tan an khawh nasa hle. League Cup-ah tunhnai maia an hneh loh Newcastle lakah hian chak tum viau mah se goal thun tur khawpin a hmawr an bawk fuh thei lo. Inkhel hmuhnawm takah hian hun eng emaw chen chhun goal lut a awm theih loh hnuin minute 55-naah Anthony Gordon chuan Newcastle hmahruaina goal a thun. Gordon goal thun hi hun tawp thlengin an veng him a, Magpies in team lian United lakah hnehna pawimawh tak changin, an mualah ngei point thum hlutak an hmu zui ta a ni.
Tarlan tawh angin United hian season kal mekah hma an sawn hlei thei meuh lo. Top 10 a awm team vawi nga hmachhawn tawhin an la tlawm vek a, team lian lakah chak an harsat hle. EPL-ah an chetha lo ang bawkin champions league lamah pawh tla thei dinhmunah an ding mek a. Khelh khat chauh khelh hmabak an nei tawh chungin Erik ten Hag a team te hi Group A-ah a mawngphah an ni mek a. Last 16 lut turin hmahruaitu Bayern Munich an hneh ngei ngei a ngai tawh. UCL atanga an tla lehzel a nih chuan an manager Ten Hag an ban tawh ngeiin a rinawm.
Arsenal in hma an hruai chhunzawm Manchester United an tlawm leh tawh
