January 15, Pathianni zan khan Premier League 2022-23 khelh chhunzawm a ni a. Inkhel ngaihven hlawh; North London derby-ah Arsenal chuan Mimuala an khingpui Tottenham Hotspurs chu si hnih faiin an hneh a. Point 8 a hmahruai fal in, champion tumin hma lam an pan zel. Inkhel dangah Chelsea an chak ve ta nawlh a. Newcastle United pawhin hnehna changin, Manchester United an lehpel bawk. Arsenal an puitling, an tlo
EPL 2022-23 tan dawn leh tantirh lam thlengin hun rei tak chhung EPL a champion tawh lo leh champions League khelh phak ngawt pawh harsat tawh Arsenal hi chetha vut tura rin an ni lova, Table chung ber luah tur phei chuan rin phak ngaihna an awm lo hial zawk maithei. Mikel Arteta hnuaiah Gunners rawlthar che vel a puitling a, champion zia lantirin an tlo ta nek bawk. Gunners hian London hmar venga an elpui lian leh an hmelma lian ber Tottenham mualah si hnih faiin hnehna an chang zui leh ta a, champion turin an inringtawk leh zual sauh bawk. Spurs an hneh tum hian Gunners si nghak Aaron Ramsdale a khel tha viau a, ani hi an chakna hnar pawimawh tak a ni.
Arsenal hian Tottenham mualah bul an tan tha viau a, mualneitu an nawr tawm reng. Mawi leh tha tak taka ball inpekual in, an khingpuite an kat kual a. Na takin an khingpuite an nawr a, na taka an khingpuite an nawr chungin an goal an venghim tha viau bawk a. Antonio Conte team te hian an mikhualte an nawr let hleithei meuh lo. An mualah si hnih an phurh hnu; chawlhlawk hnu lamah hlauhawm siam fo mahse si nghak chetha tak Ramsdale an paltlang thei tlat lo thung.
Mawi tak taka ball inpekual reng Arsenal hian minute 14-naah an khingpui tlarhnung an thiat nawn leh. Gunners tana chetha tak Bukayo Saka chuan tha zetin ball a la lut. Saka hian a thiante siamsak a tum laiin Spurs defender Eric Dier chuan an goal hnaih lamah a dang pial a. Dier ball dan pial dang zet mai hi si nghak Hugo Lloris chuan a lo khawih hman nang a, vanduaithlak takin an goal lamah a nam pial lut thung a, Arsenal hmahruaina a thunsak. Nketiah-a’n ho lam taka a thelh hnuin Arsenal chuan minute 14-na lekah hmahruaina goal an thun ta nge nge.
Hmahruaina goal an thun hnuin Arsenal an khel tha zual sauh a, mualneitu Spurs hi che hleithei lova siamin an nawr bet. Midfielder chetha tak Thomas Partey chuan kawh zet maiin a hlap tlang fua a. Spurs si nghak Lloris tan dan chi ziazang a ni lova, a goal ngei tura ngaih a nih laiin goal ban a per che lawih thung a, Spurs an him hlauh. Partey pet tha zet hi goal lo hlauh mahse Spurs an him reng thei lo. Captain cool raih mai Martin Ødegaard chuan ball a khalh rem zet hnuin minute 36-naah tha zetin a pet goal a, an goal hnihna a thun ta nge nge.
Tottenham tan goal thun hnem ber nih rual tura goal thun mamawh Harry Kane chuan an hmelma lian lakah record siam ngei tumin tan a khawh a, goal thun a tumruh hle. Kane hian chawlhlawk hmain goal thun theihna hun tha nei mahse a ball tauh rang zet mai chu Gunners si nghak Ramsdale-a’an an lo dang hman hlauh thung. Chawlhlawk hmain goal dang a luh belh theih lova, si hnih faia hmahruai chungin Arsenal in chawlhlawk an hmang.
Si hnih phur tawh Spurs in chawlhlawk an hmang tangkai a, second half-ah an khel tha ta hle. Spurs hian an hmelma lian laka an si phurh sut an tum ngawrh hle a, chawlhlawk hmaa an ngam loh em em Arsenal an ngam ta viau a, goal thun theihna hun tha insiamchhuah in, an mikhualte an nawr buai ta hle. Goal thun theihna hun tha nei bawk thin mahse Aaron Ramdale chuan pui zetin alo dansak leh mai thin a, Spurs in goal an thun thei lo. Arsenal hian an khingpui te nawr let in, goal thun belh theihna hun remchang nei bawk mahse an chhawr tangkai zo bik lova, hun tawp thlengin goal dang a luh belh lova, North London derby-ah Arsenal chuan hnehna pawimawh tak changin point thum an hmu.
Spurs hnehtu Arsenal hian khelh 18 atanga point 47 hmuin an hmahruaina an tizau a. An hnuai chiaha awm Manchester City chu point riatin an tlansan. Point riata hma an hruai fal tawh bakah an game a puitlin tak em vangin Arsenal hian champion tura rin an kai sawt hle a. EPL champion nih ngei tumin inrintawkna sang zawk nen hma lam an pan zel a ni.
An hmelma lian Arsenal ngam lova an tlawm leh tak vangin Tottenham in top 4 huang an hlat deuh deuh zel. Spurs hian vawi 19 khel tawhin, point 33 an hmu mek a, pangana an ni. An chung chiaha awm Manchester United nen an inkarah point nga a tla zep mek a. An chunga awm United, City leh Arsenal te aiin an khel tam zawk thung.
Chelsea an chak ve ta
Manager thar Graham Potter hnuaia chak harsat, tunhnaiah City laka tlawm zawn Chelsea chuan Pathianni zan khan Stamford Bridge-ah Crystal Palace mikhual in London derby an khel a. Blues hian Kai Havertz goal thun hmangin hnehna an chang.
Table-ah 10 naa awm mek Chelsea hian an mikhual Crystal Palace lakah an khel tha bik lo viau a, goal pawh an thun lawk thei bik lova, goal thun turin darkar khat an nghah tlin a ngai. Darkar khat an khel chuan awrh tihah goal an thun ta hlauh thung. Minute 64-naah Kai Havertz chuan Hakim Ziyech siamsak atangin goal a thun a, he goal hi an chakpui a, point thum hlawhchhuah nan an hmang.
London derby-ah Crystal Palace hneh mahse, Chelsea hian table-ah hma an sawn thei chuang lova, khelh 19 atanga point 28 hmuin 10 naah an awm chhunzawm zel rih. Khelh 18 atanga point 22 hmuin Palace hi 12-naah an awm ve thung.
Newcastle in United an lehpel
Season kal meka chetha tak Newcastle United chuan St. James’ Park ah paruknaa awm mek Fulham an mikhual a. Hun tawp dawn tepa Alexander Isak goal thun chakpuiin Magpies hian hnehna hlu tak an chang a. An chunga awm hman zuai Manchester United an lehpel nawn leh a, pathumnaah an kir leh.
Pathumnaah kir leh tura chak ngei ngei mamawh Newcastle United hian European competition khelh phak beiseina nei Fulham lakah goal an thun lawk thei lova, hun tawp dawn hnaih minute 86-naah Alexander Isak goal thun an chakpui ta hlauh thung a, an mamawh point thum an hmu.