October ni 21, Inrinni khan English Premier League 2023-24 khelh chhunzawm a ni a. Inkhelh ngauhven hlawh tak; London Derby ah si hnih an phurh zet hnuin Arsenal in mualneitu Chelsea lakah tlawm an pumpelh a, point hlu tak an hmu.
Stamford Bridge a lenglut Arsenal hi table ah pahnihnaa awm mek, season kal meka tlawm la nei lo an ni a. Champion lai Manchester City laka hnehna chang hlimhlawl an ni bawk. Hetihlai hian Chelsea erawh chu season thara beisei phak lo, table laihawl hnuai lama awm mek an ni ve thung. Gunners hian inrintintawksa sang tak nen Chelsea luhkhung mah se goal chhuah hmasa zawkah an tang tlat thung.
Inkhel tan atanga minute 15 na lekah William Saliba hand ball vangin Arsenal-in penalty an chawi. Pet an inchuh nak nak hnuin Cole Palmer chuan si nghak David Raya rin loh lamah a pet goal a, hmahruaina goal a thun. Si phur zawkah tang mah se Arsenal khelin awmzia a nei hleithei meuh lo a, hlauhawm siam khawpin an khingpuite an nawr thei lo. Chelsea nawr let a hlauhawm zawk zel a, Gunners an him hlauh zel a, chawlhlawk hmain goal dang a luh belh thei lo.
Chawlhlawl hnu lamah Chelsea-in bul an tan tha lehzual a, goal an thun leh thuai. Arsenal ball inpek sual hremin Chelsea hian fuh takin an mikhualte an nawr tlang a. Minute 48 naah Mykhailo Mudryk chuan cross a tumna lamah vanneihthlak takin a pet goal a, an goal hnihna a thun.
Si hniha hma an hruai hnuin Chelsea game a nghet a, an mualah an chak mai a rinawm hman. Arsenal in goal thun tum viau mah se awmze neiin an nawr tlang thei chuang lo. Game awmze nei lo an khelh reng hnuin manager Mikel Arteta chuan substitution awmze nei a siam a, Trossard, Havertz leh Smith Rowe te a luhtir. Player an inthlak kual hnuin an game a tha tan a, an vannei tel ta bawk.
Hun tawp dawn hnaih minute 77 naah Chelsea si nghak Robert Sanchez a chesual a, Arsenal midfielder Declan Rice tan goal thunna hun remchang a siamsak. Rice hian goal ruakah awlsam takin a pet goal a, an si phurh a sut then.
Goal an thun vangin Arsenal an phur thar a, na zawkin an khingpuite an nawr nghal chat. Minute 84 naah Bakuyo Saka cross tha tak chu Leandro Trossard chuan hnaite atangin a pet goal a, an si phurh a sut zo. 2-2 a nih hnuin phur zawk leh huai zawkah Arsenal an tang a, chak ngei tumin tan an khawh. An khingpuite nawr tawm viau mah se goal dang an thun belh thei tawh lo naa, tlawm an pumpelh vangin Arsenal tan result tha a ni tho thung.
Chelsea lakah tlawm an pumpelh vangin Arsenal hian season tharah tlawm an la nei lova, khelh kua atanga point 21 hmuin pahnihnaah an awm mek a. An chunga awm Manchester City nen an point hmuh zat a inang a. Pathumnaa awm mek Tottenham chu table chung bera kir thei dinhmunah an ding bawk.
Pahnihnaah Arsenal an awm chhunzawm laiin Chelsea erawh chu khelh kua atanga point 12 hmuin 10 naah an awm mek thung.
Arsenal-in tlawm an pumpelh
